هنيدي معلقا على مشروع القرن "أبوكلسون": "هزار واللي يحكم باللبس عقله صغير"

بعد إعلانه عن مشروع القرن الذي يفكر في تنفيذه، في إطار من السخرية من الأزمة التي تُثار كل صيف بسبب البوركيني والبيكيني، واصل الفنان محمد هنيدي تعليقه على المنشور الذي نشره عبر فيسبوك، مؤكدًا أنه يمزح.
وكتب هنيدي "طبعا الكلام هزار، البسوا اللي تحبوه في أي مكان عايزينه.. مش لازم تلبس حاجة غالية عشان تعجب الناس ويقولوا ده ابن ناس.. زي ما قال أبويا (ياما ناس لابسة بس قليلة الرباية).. واللي يحكم عليك بلبسك بيبقي عقله أصغر من عقل بسيط في كارتون سبونج بوب، مع الاعتذار لبسيط، الفكرة دي خلاصة 12 كوباية شاي نعناع في قهوة المحروسة في طنطا".
كان هنيدي كشف عن مشروع القرن الذي يفكر في تنفيذه الفترة المُقبلة، وذلك على سبيل المزاح، والمنشورات الساخرة التي اعتاد على مشاركتها مع جمهوره ومتابعي صفحاته الرسمية على مواقع التواصل الاجتماعي.
ونشر هنيدي صورة له من فيلم "صعيدي في الجامعة الأمريكية"، مصحوبة بصور أخرى تكشف عن المشروع، وكتب على الصورة: "أبو كلسون الزي الرسمي للصيف.. من دلوقتي هتقدر تخرج بكلسونك على البحر وانت فخور، وتنال إعجاب كل أصحابك وكل زوار البحر في الساحل".
وعلق هنيدي "مشروع القرن: لكل الرجالة والشباب اللي كانت بتتمنع أو بتتكسف تنزل الشواطئ بكلسوناتها، قدرت أحل المشكلة وأحولكم الكلسون لبراند.. هتقدر تنزل بيه 177 شاطئ في مصر من أفخم الشواطئ، محدش هيقدر يمنعك ولا يتريق عليك لأنك لابس براند ب 6 آلاف جنيه".
وتابع "يشمل الدخول لكل الأماكن الغالية والشواطئ والفنادق اللي فوق 50 ألف جنيه في الليلة، وممكن تدخل بيه من بوابات مارينا بدون ما حد يكلمك.. أول ما يشوفوا الكلسون هيدخلوك علطول.. متوفر بكل الألوان وألوان الطيف ناقصه لون".
كان هنيدي كتب قبل ساعات عبر "فيسبوك": "خلاص استقريت على مشروع.. اللي هيكون أهم مشروع في القرن ال21.. وهعلن عن المشروع اليوم الساعة 9 و11 دقيقة مساء بتوقيت شارع الجمهورية في المنصورة".
يأتي منشور هنيدي في إطار السخرية من الأزمة التي دائما ما تتكرر كل صيف، والحديث الذي يتكرر عن ارتداء البوركيني والبيكيني.