علق الكاتب أيمن بهجت قمر، عبر حسابه الرسمي بموقع فيسبوك، على حديث الفنان محمد نجاتي، الذي جاء في مقطع فيديو بثه عبر حسابه بموقع فيسبوك، وقال من خلاله: "أنا ممكن أعتزل وأريحكم كلكم مني". وكتب "قمر": "أنا قبل كده هاجمت محمد نجاتي لما غلط في المؤلفين بشكل غير مقصود لكن كفاية تجريح في الراجل كلنا بنغلط وكله رزق ونصيب". وتابع: "نجاتي موهوب وأكيد وقته هييجي، وأتمنى من محمد نجاتي ما يتأثرش بأي كلام لأن محدش بيتعمد الإساءة له وبقول له إنت أخ وزميل وليك أعمال مميزة وحصل خير". وكان الفنان محمد نجاتي، قد شارك جمهوره ومتابعيه، مقطع فيديو يكشف فيه عن اضطراره للمشاركة في أعمال فنية لا يرضى عنها، كما أعلن عن استعداده للاعتزال، قائلا: "عاوز أقول إني ماكانش ليا دخل في ترشيحي لمسلسل (محمود المصري) مع أستاذ محمود عبد العزيز، الترشيح جاء من خلال الدكتور مدحت العدل وهو حي يرزق يُسئل في ده". وأضاف: "أما بقي بالنسبة للبوست اللي اتقال فيه شوف دلوقتي أمير كرارة فين ومحمد نجاتي فين؟ طبعا أمير كرارة نجم كبير وهو ما وصلش للي فيه دلوقتي إلا نتيجة تعب وجهد وعرق، قدر إنه يوصل لحب الناس وقاعدة كبيرة جدا من الجمهور، لكن دي حاجة مش بإيديا، دي حاجة خارجة عن إرادتي". تابع: "أنا راجل ممثل وبشتغل الحاجات اللي بلاقيها كويسة ومناسبة، ممكن تكون مش أعمال بتاخد بروباجاندا كبيرة زي ما فنانين كتير بيشاركوا في أعمال أنا أتمنى أكون في الحاجات المهمة دي، لكن غصب عني أنا مضطر أاشتغل حاجات علشان أكمل بقيت حياتي لأن عندي التزامات، وعندي حاجة تخليني مش مبسوط أوي". واختتم: "وأحيانا بضطر أقبل حاجات مش راضي عنها علشان أقدر أكمل حياتي، وإذا كانت الوضعية دي مضايقة ناس أو بعض الصحفيين على فكرة أنا ممكن أعتزل وأريحكم كلكم مني وتبقى نهاية الحكاية".
