رنا سماحة بعد اعتزال زيزي عادل: "اعتزلوا من غير مزايدة"

وجهت الفنانة رنا سماحة، رسالة للفنانين الذين يعلنون اعتزالهم الفن عبر السوشيال ميديا، وذلك بعدما أعلنت الفنانة زيزي عادل اعتزالها الغناء مؤخرا.
وكتبت رنا، عبر حسابها على "فيسبوك": "جماعة ما تعتزلوا وانتوا ساكتين، وكفاية بقى تقحموا الحرام والحلال، ربنا يهديكوا ويهدينا.. انتوا حرين في قراراتكم وتُحترم.. وملناش دعوة بيها أو تفاصيلها أصلًا، مش لازم الخطب".
وأضافت: "اعتزلوا من غير مزايدة علينا الله يباركلكوا، أما بالنسبة للحلال والحرام فنصيحة، أٌقرأوا كويس وابحثوا كثير قبل ما تصدروا للناس أفكاركوا".
وكانت زيزي عادل، أعلنت اعتزال الغناء، عبر حسابها بموقع "إنستجرام"، قالت فيه: "أنا طالعة أقول خبر مهم جدا أخدته في حياتي، ويمكن يكون أهم خبر خدته في حياتي، هو قرار الاعتزال، قررت أسيب المهنة اللي أنا بشتغلها".
أضافت: "يمكن القرار ده ما أخدتهوش امبارح يعني، أخدته من فترة كبيرة، أنا مطلعتش أقولكم الخبر ده، لإني كنت حابة أتكلم مع نفسي ومع الناس القريبة مني جدا، والناس دي دعمتني جدا لما قولتلهم القرار ده، وشجعوني جدا إني أعمل كده، أنا ببعد عن أكتر حاجة من أكتر من المغريات في الدنيا، اللي هي الشهرة، وهبعد عن الشهرة والأضواء والفنانين، اللي هي الناس بتقرب منها".
وتابعت: "الفترة اللي فاتت قربت من ربنا جدا، ولقيت القرآن بيقولي إني لازم أكون ملتزمة، لازم أكون على قد ما أقدر أكون ملتزمة، ويمكن تكون مستغربين، إني طالعة بشعري ومش محجبة، ده لإن ربنا لسه ما أنعمش عليه بخطوة الحجاب، وبدعي ربنا إني ألبس الحجاب، وكل حاجة بتيجي خطوة خطوة، مفيش حاجة بتيجي مرة واحدة، فأنا خدت خطوة وإن شاء الله تيجي الخطوة اللي بعدها".
واستطردت: "عايز أقولكوا كمان إني بالنسبة للفن هو مصدر دخلي، أنا سبت حاجة بعيش منها، ولكن أنا سبت ده وعارفة إن ربنا هيرزقني، ربنا مبينساش حد، فسايبه ده على ربنا، ومعنديش مشكلة، بالعكس راضية جدا على القرار اللي أنا أخدته ومبسوطة بيه جدا، وحابه اللي جاي من حياتي، ويمكن بعد ما أخدت القرار ده، تعرضت لمواقف اختبار من ربنا، ولما سألت أهل العلم أفتوني بكده، وكنت محطوطة تحت ضغط أوافق أو ما أوافقش، والاختبار كان بالنسبالي صعب شوية، خصوصا إن البني آدم ضعيف، ويمكن العرض اللي جالي مجاليش وأنا بمارس المهنة، والحمد لله قدرت أقف بدعم من الناس اللي حواليا".
وأضافت: "مش عايزة أخش في حتة الفن حلال والفن حرام، عشان مبقاش طالعة بتكلم كإني داعية، أنا طالعة أتكلم كزيزي، وطالعة أقول إني بطلعت أغني، لإني مش صح، وديني بيقول كده، وأنا حابة إني أموت وربنا راضي عني، وكلنا نمتنى حاجة زي دي، وعايزة أموت اكون مستعدة لمقابلة ربنا، وأكون راضية عن نفسي وعن حياتي وعن شخصي وعن أفعالي، والحمد لله التزمت، وقربت من ربنا طبعا بطريقة كويسة، وربنا يكرم والتزم أكتر وأكتر، وعايزاكم تدعولي ربنا يثبتني".
زيزي عادل من مواليد 26 أكتوبر 1987، بدأت حياتها المهنية عقب تخرجها من معهد الموسيقى العربية، حيث كانت بدايتها الفنية مع برنامج المسابقات "ستار أكاديمي"، ونجحت بإثبات موهبتها في وقت قصير، ثم انضمت إلى شركة روتانا وأصدرت أول ألبوماتها بعنوان "واحدة طيبة" وحققت نجاحًا طيبًا، ثم أصدرت ألبومها الثاني "وعد عليا".