علقت النجمة دنيا سمير غانم، على مشاركتها في احتفالية "قادرون باختلاف" التي أقيمت الأحد، بحضور الرئيس عبد الفتاح السيسي. ونشرت دنيا، صورا لها من الاحتفالية عبر حسابها على إنستجرام، وعلقت: "تشرفت النهاردة بالغناء أمام سيادة الرئيس عبد الفتاح السيسي في احتفالية قادرون باختلاف، وسعدت وتشرفت بكلامه ليا جدا، وبنظرته اللى كلها أبوة". وتابعت: "أحب أشكر الجمهور العظيم اللي دايما بيشجعني وشفت في عنيهم وفي ردود أفعالهم فرحتهم بوجودي في الحدث الهادف مع الملايكة اللي كانوا سبب في ثقتي بنفسي النهاردة بإحساسهم الصادق في تعبيرهم عن حبهم لي.. الحمد لله و فرحتهم باليوم ده وإن في حد مهتم بيهم وبيفكر فيهم وفي احتياجاتهم". واستكمل: "بشكر كل الزملاء والأساتذة اللي اتشرفت إني كنت موجودة معاهم في نفس الحفلة، وعلى رأسهم الموسيقار الكبير عمر خيرت وأستاذ أشرف عبد الباقي.. سعيدة جدا إني ابتديت يومي بتشجيعهم وحرصهم إنهم يطمنوا عليا قبل ما أطلع وكمان زملائي الأعزاء مصطفى شعبان ويوسف الشريف والمذيعين شريف مدكور وإيمان الحصري اللي مروا بظروف صعبة وعدوها بكل قوة وثبات بفضل ربنا ورحمته، وكنت مبسوطة بيهم وحسيت بقد إيه أغلب الموجودين مننا كان عندهم تحديات في حياتهم زي الملايكة اللي استمدينا قوتنا منهم، النهاردة ومن أهلهم الأبطال". وأوضحت: "بشكر كل القائمين علي الاحتفال د/أمل مبدا الأم التانية للقادرون باختلاف.. فخورة جدا بأخويا هشام جمال لأنه اشتغل وتعب من قلبه في إخراج الحفلة والأغاني واختيار الأصوات اللي دخلت قلوبنا كلنا، وعن نفسي بشكره على أغنيتي "بلادي اسلمي" كلمات الشاعر الموهوب محمد إبراهيم وألحان العبقري المتنوع هشام جمال وتوزيع الموزع الشاطر جدا مادي". وأضافت: "في النهاية حبايبي الغاليين بابي ومامي.. إتأثرت جدًا النهاردة إني لأول مرة أروح في يوم مهم ليا من غير ما أسمعك يا مامي بتدعيلي أو ترقيني قبل ما أنزل أو بابي بيقول لي.. ربنا معاكي يا حبيب بابي.. يا رب أكون شرفتكم، بحبكم و وحشتوني أوي، ربنا يرحمكم يا أغلى حاجة في حياتي". وقدمت الفنانة دنيا سمير غانم، أوّل أداء غنائي لها منذ وفاة والديها، حيث شاركت في النسخة الثالثة من احتفالية أصحاب الهمم "قادرون باختلاف"، بحضور الرئيس عبد الفتاح السيسي. وأدت "دنيا" مع الكورال أغنية "بلادي اسلمي"، بصوتها ولغة الإشارة، وحرص الرئيس السيسي على الترحيب بها وشكرها لمساهمتها في الاحتفالية ومواساتها لرحيل والديها، وشكرته على تقديره لمشوار والدها الفنّان الراحل سمير غانم. كما شارك في الاحتفالية عددا من أبرز نجوم الفن، منهم الموسيقار عمر خيرت الذي قاد الفرقة الموسيقية في عزف أغنية "زي ما هي حبها بحلوها بمرها"، وأدّاها أحد أصحاب الهمم. View this post on Instagram A post shared by Donia Samir Ghanem (@donia.samir.ghanem)
