"لسان القاتل مكنش تقيل".. صاحب "العجلة" يروي تفاصيل حادث الإسماعيلية

كشف إسماعيل يوسف عبدالسلام، المواطن الشهم الذي تصدى لسفاح الإسماعيلية، تفاصيل الحادث، قائلًا: "أنا راجل على المعاش وكنت بشتغل في هيئة قناة السويس في ورش الكاوتش، وكنت أمر من الشارع الذي وقع فيه الحادث، وكنت راكب العجلة ولقيت واحد متغرق في دمه، والتاني بيضرب فيه والناس واقفة تتفرج، وبشكل لا شعوري مسكت العجلة بتاعتي ودخلت فيه بقوتي، حاجة من عند ربنا وطبيعية".
وأضاف "يوسف" في مداخلة هاتفية لبرنامج "يحدث في مصر" على فضائية "إم بي سي مصر" اليوم الثلاثاء: "وأنا داخل على القاتل قولتله هتودي نفسك في داهية كده غلط، وكان رده عليا قالي ياعم الحاج أبعد أنت"، موضحًا: "القاتل كان شخص طبيعي والكلام معاه كان طبيعي ولسانه مكنش تقيل ومش باين عليه أنه شارب مخدرات ومكنش بيتهته".
وتابع: "دخلت عليه وقولتله يابني هتضيع نفسك، وهو كان بيهوشني بالسكينة، وقتها كان القتيل في ضهري وغرقان في دمه"، موضحًا: "قلت للقاتل أنا خايف عليك ومش عايز منك حاجة، ولكن القاتل قالي دا اغتصب أمي واختي مرة واتنين".
وأردف: "لما قالي أمي دي خلتني خلاص جسمي مستحملش والحماس اللي كان معايا راح، ونزلت العجلة وروحت ماشي ومردتش أقف وأشوف أي حاجة لأن كلمة أمي دي كلمة كبيرة وأكبر حاجة محدش يستحملها، في ساعتها مفيش تفكير ومشيت وفكرت بشكل عاطفي"، موضحًا: "المنطقة التي بها الحادث لا يحدث فيها مشكلات نهائي ومشكلة المخدرات موجودة في المنطقة ولكني مليش دعوة بيها أنا وأسرتي".
وأوضح: "لما نزلت العجلة ومشيت مردتش أرجع من الشارع والناس اتلمت"، متسائلًا: "فين الناس"، مضيفًا: "الجراءة بتيجي من عند ربنا مش بأيد الإنسان، كنت شايف السكينة في أيد القاتل ولكني دخلت عليه عشان أوقفه عن قتل الشخص دا"، مؤكدًا: "روحت البيت حكيت لأسرتي على اللي حصل وكان في دم في العجلة مسحتها وغسلت الدم من العجلة، والمنظر لما شفته على الأنترنت لما شفت القتيل شال رقبة القتيل خلاني قلت يارتني كنت كسحته".