"وحشتوني".. لميس الحديدي توجه رسالة حب ل" الإبراشي وإيمان الحصري وأسماء مصطفى"

كشفت الإعلامية لميس الحديدي، عن تفاصيل تطورات الحالة الصحية للإعلامي وائل الإبراشي، قائلة: "وائل خرج من المستشفى وبقاله فترة في البيت بيتعافى من آثار الكورونا"، موجهة رسالة له قائلة: "اتمنى تاخد حبوب الشجاعة والقوة وتبتدي تخرج وتنزل وترجع مرة أخرى للعمل أحيانًا في العمل شفاء للروح".
وقالت "الحديدي" خلال تقديمها لبرنامجها "كلمة أخيرة" على فضائية "ON E" اليوم الثلاثاء: "حياتنا في الشغل إحنا زي السمك بنعيش في الشغل وبنتنفس بشغلنا، أتمنى أن وائل وهو زميل من جيلي وجيل حفرنا وجودنا ومكانا بصعوبة جدًا، منتظرينك أخرج أنزل اشتغل مش لازم تكون في كامل لياقتك ولكن حلقة ورا التانية ممكن تساعد في الشفاء والاستشفاء اتمنالك تخرج وترجع رسالتك وصلتني وكل الناس بتسأل عنك وبتحبك".
وأضافت: "أن الإعلامية إيمان الحصري تعاني من مرضها أيضًا وناس كتير بتدعيلها وبتحبها، وبقولها كتير من اللي أنتي عديتي بيه ميستحملوش بشر"، موضحة أنها لا يمكنها الإفصاح عن تفاصيل الحالة الصحية للإعلامية إيمان الحصري، قائلة: "إيمان هتطلع تقولها وهتقدر تقول لو في حساب أو مفيش، لأنها هي اللي لازم تواجهه، واتمنى برده الشفاء لها وتخلص الكام عملية اللي فاضلين وعارفه إنك قادرة إنك تعديه عشانك وعشان بنتك والناس اللي بتحبك".
ووجهت رسالة للاعلامية أسماء مصطفى، قائلة: "أسماء دي أصغر واحدة لكنها تتعرض لمرض شديد تجربة صعبة مريرة لكن عارفه إنك هتعدي وتمتلكي الإيمان والقوة عشان ولادك وزوجك وحبك للحياة والعمل اتمنى لهم يرجعوا كلهم والشفاء ولكل أصدقائي عشان هما شخصيًا وحشوني اوي مفتقداكم وكثير من الجمهور مفتقدكم".