"بالمجان وبدون واسطة".. شريف مدكور يكشف عن كواليس تلقيه للقاح كورونا- فيديو

أكد الإعلامي شريف مدكور، أنه تلقى الجرعة الأولى من لقاح فيروس كوورنا، مشيرًا إلى أنه سيتلقى الجرعة الثانية بعد فترة ولكنه لم يفحص عن اسم اللقاح الذي حصل عليه، قائلًا: "مش عايز أقول اسم اللقاح لأن كل اللقاحات زي بعض وأحنا كلنا ثقة في وزارة الصحة وعارفين هيجيبولنا ايه".
وقال "مدكور" في مداخلة هاتفية لبرنامج "مساء دي إم سي" على فضائية "دي إم سي" اليوم الأربعاء: "الناس المتخوفة من الحصول على اللقاح عايز أفكرهم أننا زي دلوقتي من سنة كنا بنحلم وبنقول أمتي هيطلعوا اللقاح، ودلوقتي بقى عندنا أكتر من نوع من اللقاحات"، موضحًا أن لقاح كورونا آمن وحصل عليه ولم تحدث له أي مضاعفات، قائلًا: "محصليش أي حاجه إلا شوية نوم زيادة بس، وحتى الحقنة محستش بيها".
ودعا الإعلامي شريف مدكور المواطنين من كبار السن أصحاب الأمراض المزمنة للحصول على لقاح كورونا، مؤكدًا:"أنا عندي 48 سنة وأخدت اللقاح لأني من أصحاب الأمراض المزمنة"، كاشفًا عن طريقة تقدمه للحصول على اللقاح قائلًا: "زيي زي أي حد قدمت عبر الخط الساخن 15335، وأخدوا بياناتي من أسبوعين ونصف، وجالي رسالة مكونة من 20 رقم وقبل التطعيم بيومين جالي رسالة على التليفون بمعاد ومكان التطعيم، ويوم التطعيم جالي رسالة للتذكرة بمعاد اللقاح ومكانه ومواعيد فتح وإغلاق المركز".
وأكد "مدكور": "الفترة الماضية حصل عدد من أقاربي وأصدقائي ومحصلهمش أي مضاعفات، والجميع يحصل على اللقاح بالمجان ومبندفعش ولا جنيه"، موضحًا: "الحصول على اللقاح مش بالواسطة والفيديو اللي حصلت فيه على اللقاح نزلته وزارة الصحة على صفحتها الرسمية والأمر مفيهوش مجاملة ولو في واسطة مكنتش هعمل فيديو وأظهره على الملأ".
وأردف: "من الممكن لجميع المواطنين الاتصال بالخط الساخن أو التسجيل على الموقع والأمر في منتهى السهولة، لكن اللي يتصل على الخط الساخن لابد أن يكون معه بطاقته الشخصية لاستكمال كل البيانات الشخصية وهيجيله رسالة عادية على التليفون بعد ما يقفل عشان يتأكد أن كل حاجه صح".