أعرب الفنان علاء زينهم، عن سعادته بردود الفعل التي تلقاها عن شخصية "عم جلال"، التي قدمها في مسلسل "البرنس"، مؤكدا أنها ردود فعل جميلة جدا، وخاصة مشهد ضربه بالقلم، أظهر مدى حب الناس لي. وقال زينهم، في تصريحات خاصة ل"مصراوي": "القلم الذي أخذته على وجهي مكنش حقيقي، وفيه ناس كتير تعاطفت معايا واتضايقت من أحمد زاهر بسبب الموقف ده، بس ده تمثيل والناس عارفة كدا كويس، وعارف رد فعل الناس لصعوبة الموقف". وعن كواليس العمل، فقال زينهم: "الحب بينا كان واضح وطاغي جدا، وده كان ظاهر على الشاشة، وإن كلنا كنا في أحسن حالاتنا كممثلين، وده بفضل ربنا ثم القائد محمد سامي والمنتج الفني شادي علام، اللي كان موفرلنا كل سبل الراحة". وعن التعاون الذي جمعه مع المخرج محمد سامي، فقال: "سامي راجل موهوب، وربنا أنعم عليه بالموهبة، وفي نفس الوقت عامل سيناريو حلو جدا، وكان ليا الحظ إني اشتغل معاه عملين قبل كدا، ودي التجربة التالتة، وراجل شغله واضح وله بصمة في مجاله، وكان بيشرح معانا كل مشهد ويوصلنا لحالة كويسة بكل مشهد قبل تصويره". وأضاف: "دوري بالعمل يحمل عدة رسائل مهمة، منها إن إحنا ولاد البلد والاحياء الشعبية موجود فينا الأصالة والناس الطيبة اللي بتقف مع ولادها اللي ربوهم وهم صغيرين، فأنا متربي وأنا صغير في ورشة الحاج حامد والد رضوان البرنس، وحاولت أرد غيبة رضوان عن ورشته، وأيضا إن فيه ناس متأصلة لسه زي (علا وأمها)، والناس الطيبة في الحارة دي كلها حاجات بتبين الخامات الطيبة الموجودة في الأحياء الشعبية بمصر". مسلسل "البرنس" من تأليف وإخراج محمد سامي، وبطولة محمد رمضان "رضوان"، نور اللبنانية "علا"، روجينا "فدوى"، سلوى عثمان "سميحة"، أحمد زاهر "فتحي"، نجلاء بدر "لبنى"، إدوارد" عبدالمحسن"، دنيا عبدالعزيز "شيماء"، عبدالعزيز مخيون "حامد"، ريم سامي "نورا"، بدرية طلبة "عظيمة"، رحاب الجمل "عبير"، أحمد فهيم "رأفت"، محمد علاء"ياسر"، أحمد داش "عادل"، ومحمد مهران "حمادة"، وعلاء زينهم "عم جلال".
