"اتعودت عالبهدلة وبمشي عكس التيار وأعدائي كتير".. أبرز تصريحات سما المصري ل"قطعوا الرجالة"

استضافت الإعلامية راغدة شلهوب، في حلقة جديدة من برنامجها "قطعوا الرجالة" المعروض على قناة النهار، سما المصري، والتي تطرقت لجوانب كثيرة في حياتها الشخصية، ومن بينها الهجوم الذي يطولها، وفي السطور التالية نكشف أبرز التصريحات التي جاءت على لسانها..
- "أنا عنيفة شوية بس زي القطط لما حد بيقرب منها بتخربشه، والمشاكل والمواجهات اللي دخلت فيها عادة الطرف الآخر هو اللي بيبتدي. وفيه ناس كرهاني وناس بتبقى عايزة تعمل زيي ومش عارفة".
- "الرجالة مش بيحبوني، لأن في المجتمع الشرقي الراجل باصص للست على أن صوتها ميعلاش متتخانقش معاه حتى لو ليها حق، متقولش رأيها، ولما يلاقي واحدة زيي بيتضايق، إزاي فيه واحدة بالجرأة دي لأن ساعات هو مبيكونش عنده نفس الجرأة".
- "بحب الست تبقى عقلها أكبر من جمالها، عادة متلاقيش عندنا ست حلوة وذكية، الست ذكية شكلها مش حلو ومش مهتمة بنفسها، بتبقى عملية اكتر، بالنسبالي الست لازم تهتم ببيتها وشغلها واولادها وأول حاجة بنفسها".
- "شكلي ظلمني. أنا خريجة آداب إنجليزي، مكنش حد يعرف غير لما قدمت في الانتخابات، وناس كتير كانت فكرة إن قناة فلول اللي كانت قالبة الدنيا في فريق كبير شغال عليها، بس الفكرة طلعت من عندي واشتغلت عليها لوحدي، بحب اجيب حاجات غريبة مش موجودة وأمشي عكس التيار، وبحب الست اللي كده لو مشيت زي معظم الستات مش هيكون في اختلاف بيني وبينهم، الست لما بتختلف في أداء عمل ما حتى لو عكس الاتجاه هتكون مميزة".
- وعن أزمة فستان الفنانة رانيا يوسف، قالت "واحدة ممكن تلبس لبس ميعجبش شريحة كبيرة مش متعودين عليه زي رانيا، وقلت إن رانيا حرة في نفسها، لكن لو كنت لبسته كان بوليس الاداب جه اخدني من أدام المهرجان، العين عليا أنا غير رانيا وغير أي فنانة على الساحة أنا ليا أعداء كتير، أعدائي إخوان أو الناس اللي بيهاجموني ويتمنولي الغلط بعض الثورجية بعض الفلول، فنانة متضايقة مني، الفنان لما يفسح عن هويته الكروية أو السياسية بيُنتقد بشكل فظيع معرفش ليه ده موجود في المجتمعات الشرقية".
- "زي أي بيت مصري ربى ولاده أهلي ربوني، وبعد كده يدوله مطلق الحرية بس أي عواقب هو يتحمل نتائجها، أنا تربية اقاليم فلاحين، دايما الأهل بيشوفوا ابنهم أحسن حد، اخدت من والدتي خفت الدم، بتقولي ربنا يهديكي، على زمن والدتي وعمتي كانوا بيلبسوا لحد هنا وبيمشوا في الشارع لما ربنا هداهم ولبسوا طويل محدش قالهم يعملوا كده، الهداية دي من عند ربنا".
- "اتعودت عالبهدلة حياتي يا في قسم يا محكمة يا نيابة، بعمل اللي بعمله وأنا مقتنعة بيه حتى لو غلط".
o "أنا بعيط بسرعة على عكس ما الناس متوقعة، مبحبش الوحدة ولا الليل ولا غروب الشمس بحس بحاجة مش حلوة"، و(بكت): "مقدرش أشوف منظر الغروب أحب الصبح والشمس بتطلع، وفي وقت معين بتضايق من الشتايم اللي بتوجه ليا كل مشكلتي إن بحب الصراحة والوضوح لكن الناس بقت وحشة جدًا".