أول تعليق من أصالة على ما تعرضت له في بيروت

حرصت المطربة السورية أصالة على التواصل مع جمهورها، عبر حسابها الشخصي على موقع "انستجرام"، لتعبر لهم عن امتنانها وسعادتها بوقوفهم إلى جوارها في أزمتها، إذ تم توقيفها في مطار رفيق الحريري ببيروت واتهامها بحيازة مادة "الكوكايين" المخدرة.
وكتبت أصالة رسالة مطولة لمتابعي صفحتها، جاء فيها: "على قدّ ما كانت الساعات الطويلة الماضية قاسية وصعبة..على قدّ ما فرحت بالمحبّة وبالاهتمام وبالثقة اللي غمرتوني فيها.. ماتعوّدت بحياتي فسّر أو وضّح أو كون بمطرح المتّهم... مو بس لثقتي بنفسي بل لأنّي ومن عمري ست سنين وأصغر وأنا بين الناس وكتار كتير اللي اهتمّوا فيني، وكتار كتير اللي أضافولي وعلّموني.. ولاأبالغ لو قلت إنّي بحسّ بمسؤولية التعبير حتّى فيما له بالغ الأثر على أماني وأمان عائلتي، لأنّي ضمير هالناس اللي مابيقدر صوتهم يوصل.. طبعاً مرّات بندم وبقول (شو كان بدّي بهالتعب) بس الأكيد إنّي خلقت لكون متل ما أنا".
وأضافت "بيروت حبيبتي وتوأمي والناس اللي فيها بتساعدني وبتحبني أكتر بكتير من غيرهم.. أنا بحسّ حالي خلقت فيها وبعشق كلّ ذرّه من ترابها.. ومارح أزعل منها كتير لأنّه مالها ذنب"، وتوجهت بالشكر لكل من ساندها وساعدها من المسؤولين في بيروت.
وأشارت أصالة إلى أنها وصلت الاثنين بيتها متعبة بعض الشيء، ومصدومة وتشعر بالقهر، متابعة "بس كمان عندي أمل بالضمير وخصوصاً لمّا قريت بعض الرسائل لمن لا تربطني بهم مودّة ومع ذلك نفوا عنّي ما أُشيع، والحقيقة هالشي فرّحني متل ما فرحت بالكم الهائل من المحبّة والاهتمام اللي خفّف عنّي شعور الظلم اللي مارح أتعوّد عليه، ما في شي اسمه صحافة صفرا بس فيه ناس صفرا بيشتغلوا صحافة، وكلامهم أنتوا ردّيتوا عليه، ومالحق يجرحني، وسؤالي إلهم (ليش لازم كون مُتّهمة وملوّثة ليكتب قلمكم عنّي؟ ممنوع كون حرّة؟ ممنوع طالب بالعدل؟ ممنوع كون بشر متل البشر اللي خلقهم الله ليكونوا جنب بعض ؟)، أملي ببكره أحلى كبير وأملي حتّى بالضمير اللي مات يصحى كمان مازال موجود".
واختتمت أصالة رسالتها بالتأكيد على أنها أرادت أن تطمئن الجمهور عليها، موضحة "وأنا كتبت لطمّنكم، إنّي قدوة ووفيّة لثقتكم ومعكم عم بستنّى العدل يسود، ومعكم عم كافح لنكون أحرار، ورح أرجع بيروت لما بتشتقلي، وتحميني قبل ماتظلمني".