صديقة: "نفسي المعاش يزيد عشان نقدر نعيش أنا وبناتي الأربعة"

"أنا بقبض معاش مش بيكمل 300 جنيه، والمفروض أعيش بيهم أنا وبناتي الأربعة، وبنصرف منهم، ولو حد مرض يبقى الكشف والعلاج منهم".. بهذه الكلمات بدأت صديقة حسانين، 62 عامًا، أرملة، ومقيمة بقرية نزلة الأبلق، بمركز صدفا، حديثها ل"ولاد البلد".
منزل مسقوف جريد
تقول صديقة: أعيش أنا وبناتي الأربعة في منزل مسقوف بالجريد، ولا يدخله ماء ولا نور، ولكن "بنتصرف وبنوّر بأي طريقة"، كما إننا نقوم بأخذ المياه من الجيران، وصمتت قليلًا قبل أن تضيف "كويس إن البيت موجود عشان يسترنا، بناه أبو البنات قبل ما يموت، وعندي ولدين متجوزين، ولكن قطعوا علاقتهم بينا خالص.. كل واحد يا دوب مكفي بيته وعياله واللي جاي على أد اللي رايح، والبنات الأربعة متجوزوشي لسه، وأصغرهم عندها 25 سنة"، متسائلة "هجوزهم من فين؟".
معاش لا يكفي
تضيف صديقة "أنا بقبض معاش أبوهم اللى بيقولوا عليه معاش السادات، ومش بيكمل 300 جنيه، وساعات بيوصل ل 285 جنيهًا بالعافية، وده بعد الزيادات، وبنعيش على مساعدات الناس وأهل الخير".
وتنهي حديثها بقولها "كل اللي بتمناه يبقى لينا دخل ثابت نعرف نعيش بيه أو حتى المعاش يزيد أو وحدة من البنات الأربعة تشتغل أي حاجة حتى تعرف تجيب لنا أي فلوس نقدر نعيش منها.. تعبنا والله".