''تويتر'' تعليقاً على حجب ''يوتيوب'': ''هيكون زي حظر التجوال بالظبط !''

أثار حكم محكمة القضاء الإداري بحجب موقع ''يوتيوب'' عدد من التعليقات الساخرة والغاضبة على موقع التواصل الاجتماعي ''تويتر''، بعد حكم المحكمة بوقف عمل موقع ''يوتيوب'' فى مصر لمدة شهر بسبب نشره للفيلم المسيء للرسول ''صل الله عليه وسلم''.
فقال ''مصرى'': ''حظر اليوتيوب كلمة حظر ومنع دي قديمة جداً يا فنديه.. عيشوا معانا فى العالم بتاعنا أو موتو وريحونا !''، وقال ''محمد راضى'' :'' معلومة للقضاء المصري اليوتيوب ممكن تكتب بيهم أسس الإلحاد ممكن تكتب بيهم آيات من القرآن بلاش غباوة''.
ورفض رسام الكاريكاتير ''أشرف حمدي'' الحكم وقال أنه سيتسبب فى خسارة الآلاف من المصريين اليذن يعملون على ''يوتيوب'' فى مصر، وقال ''أسامة علام :'' كانو حظروا مواقع البورنو أهو كله كلام.. خليهم يتسلوا''.
وربط البعض القرار بحظر موقع ''يوتيوب'' مثل قرارات حظر التجوال والتى كان آخرها فى مدن القناة بقرار من الرئيس ''مرسى''؛ حيث قال ''محمد'': '' هيحظروا اليوتيوب شهر!.. ده عشان معرفوش يطبقوا حظر التجول فقرروا يطبقوه ع اليوتيوب؟!''، كما قال ''وليد'': ''حظر اليوتيوب زي حظر التجول كده!.. الناس كلها هتدخل اليوتيوب تتفرج ع الحظر''.
وقالت ''هاميس'' في تغريدة لها: ''مصر مش إيران عشان يتمنع فيها اليوتيوب''، وقالت ''أُمنية'' :'' القضاء الإداري يقرر حظر موقع اليوتيوب وحجب المواقع لمدة شهر.. هو الجهل والغباء وصلوا لكده!''.
وسخرت ''إيمان الجبالى'' فى تعليقها من قرار الحظر وقالت: ''ربنا يفك حظرك يا يوتيوب''، وقال ''طارق'': ''طبعاً الناس كلها هتقعد في البيت الشهر الجاي عشان تتفرج علي حظر اليوتيوب''.
وعلقت ''أسماء عيسى'': ''أوعى يكون زى حظر التجول.. احنا مبنغلبش هنفتحه''، وقالت ''رانيا عمر'': ''حلقة أخرى من مسلسل الغباء السياسي للإخوان''، وقالت طالبة بكلية الطب ''فاطمة والى'': ''طب أنا بذاكر فارما وبايو وميكرو من اليوتيوب مفكرتوش في ده!''.
وكان ''محمد حامد سالم'' أكد في دعوى رفعها أن موقع ''يوتيوب'' خالف بنود الخدمة المنصوص عليها قانونًا، وتسبب في تهديد الأمن والسلام الاجتماعي بما قام به من نشر فيديو يسيء للمعتقدات الدينية الإسلامية، وطالبت الدعوى أيضا بمسح وإلغاء الفيديو المسيء نهائياً.