آه يا وطن

لمّا الوطن بيموت و يملاه العفن
و تلاقي حلمي جنب حلمك وطّى راسه و ادّفن
يبقى الوطن مبقاش وطن
لمّا طموحي جوه صدري يكون جريمة و يتّسجن
يبقى الوطن مبقاش وطن
لمّا يكون الظلم عادي، الفقر عادي ، و الغلابة بتطّحن
يبقى الوطن مبقاش وطن
ليه الوطن مبقاش وطن
جايز عشان أهله و حكاموه باعوه من غير تمن
جايز عشان ثواره ماتوا في الميدان من غير تمن
جايز عشان لو قلنا آه ه بيكون مكانّا في الكفن
آه ه يا وطن من غير وطن
نفسك تلاقي حضن دافي تنام عليه و تتحضن
تصرخ بصوتك في الوجود "أنا كنت يوم أحسن وطن"
آه يا وطن