عمرو مطاوع يكتب: معاداة الاسلامية

شاء قدر ربنا إني كنت مراقب على المرحلة أولى من الانتخابات في الإسبوعين إلي فاتوا دول وكانت أكتر التجارب المحبطة اللي عملتها في حياتي .
فعلاً لسة قدمنا كتير قوي على الانتخابات بشكلها الصح ، كمية المخالفات والتجاوزات فعلاً محبطة ، وأنا رصدت ( وديه شهادة قدام ربنا ) مخالفات من الحرية والعدالة والكتلة المصرية والنور وبعض المستقلين ، أكثرها كانت من الحرية والعدالة/الاخوان المسلمين . للي مايعرفش ، قانوناً في فترة اسمها صمت إنتخابي يومين قبل الإنتخابات ممنوع فيها الدعاية بأي شكل سواء إعلانات أو حتى في الشارع .
كلنا شفنا تربيزة الحرية والعدالة قدام كل لجنة إنتخابية بالكمبيوترات و بيساعدوا الناس انها تعرف رقمها و هكذا ومن غيرهم كانت ناس كتير فعلاً هتفشل في انها تصوت .
هيجي بقى حد يقولي طيب ماهم جامدين قوي أهم عايز أيه !!! ، هي ديه أم المشاكل المصرية عدم إحترام القوانين بأي شكل من الاشكال ولازم نلاقي لنفسنا ألف مبرر للموضوع .
الدعاية ممنوعة يبقي ممنوعة خلصت كدة ، مش و الله احنا بنساعد الناس و احنا مش في نيتنا دعاية ( بصرف النظر عن إن كان ممكن يعملوا إلي بيعملوه دة من غير يفط و لا لبس مطبوع عليه الدعاية ) .
هفضل أقول النية مش مهمة إحترام القانون هو إلي هيخلينا دولة محترمة والموضوع على فكرة مش في الدعاية و بس ، ده في كل نواحي الحياه المصرية واحد ماشي غلط في الشارع " أصلي مستعجل " واحد بيغش في الامتحان "أصل أنا بس كنت بسأل صاحبي على الساعة " وغيرها وغيرها
عشان نوصل لدولة كلنا نبقى فخورين بها لازم إحترام القانون ولازم الناس إلي بتطبق القانون يبقى عندهم حزم في التطبيق - حزم مش تعسف- حد إرتكب مخالفة في اللجنة يطرد برة لكن و الله دة كويس وكان بيساعدنا و والله ده بيطلع الأول على طول - لاحظ إن الموضوع يمشي على الإنتخابات والإمتحانات
مخالفات المرور لازم ردع لها مش لو بنت حلوة ولا حتى لو الشارع واقف نفوتها ونقول نعمل أيه يعني!! ، قدامك تستنى الزحمة أو حتى تستنى لما المرور يجي ينظم الموضوع مش تمشي على مزاج حضرتك يعني
لكن طالما القانون مانع يبقى بسيطة ممنوع .
-------------
نخلص من العملية الانتخابية إلي كانت أبعد ما يكون عن النزاهة لنتيجة المرحلة الأولى إلي جت زي ما المصريين كلهم متوقعين نصيب الأغلبية للأخوان و يجي وراهم حزب النور اللي إدعوا انهم بيمثلوا الاسلام ( مش أنا اللي بقول ان ده إدعاء ده شيخ الأزهر )
و من هنا جت المشكلة . المصريين و أعتقد إن ده بسبب الإحباط العام بيبدعوا في فن السخرية فطبيعي إن الاخوان و حزب النور ينالهم من السخرية جانب. سخرية من مصر هيبقى شكلها عامل ازاي و ايه اللي هيحصل فينا و كلنا شفنا الحاجات دي .
أعتقد إن عدم إحساس المصريين بإن ليهم دور أو مشاركين في بلدهم بخليهم عندهم حالة من الرغبة إنهم عايزين يعملوا حاجة و عايزين يدافعوا عن حاجة و ده أعتقد إنه طبيعي لأن الانسان بيحب يحس إنه بيعمل حاجة
!
فكان نتيجة التناقض ده إن بعد هوجة السخرية من الاخوان و السلفيين ( مش بيمثلوا الإسلام طبقاً لشيخ الأزهر ) يبتدي ناس تتهم بعض إن ده هجوم على الإسلام و سخرية من رموزه و الغريب في الموضوع إن ناس كانت بتشارك في السخرية من ناحية و هما هما إلي بيقولوا كفاية بقى سخرية من الاسلام .
يمكن في سخرية زادت عن حدها و كان فيها شبهة تتطاول على رموز اسلامية بس كانت في نطاق محدود جداً .
لكن معظم الحاجات كانت سخرية على النظرة السطحية للاخوان وحزب النور و انهم بيهتموا بمظهر الأمور . و علي فكرة السخرية مقبولة في السياسة ( ده سبب إن قلنا بلاش ندخل الدين في السياسة )
للتوضيح احنا في مصر عندنا محلات البان اسمها المدينة المنورة و فرجلو للمنتجات الغذائية و منتجات الحسن و الحسين و عادي ما مفيش حد شايف إن ده تطاول على الاسلام و لا حاجة .
أصبح في حالة من التربص و كل واحد مستني غلط للتاني عشان يمسك فيه ،وخلاص بقى كل واحد شايف إن أي سخرية من الاخوان و النور هي معاداة "الاسلامية " فأرجوكم بس بلاش الموضوع ياخد أكبر من حجمه وكل حاجة تبقى معاداة للاسلام عشان الكلمة متفقدش معناها ، اليهود فضلوا يقولوا على كل حاجة معاداة السامية لحد ما الكلمة مبقاش ليها معنى وبقت معاداة السامية نفسها محور النكت و السخرية للعالم كله
أخر حاجة بقى ، شفتوا المسئول عن البلد عمل أيه بالانتخابات ؟؟ إستخدم أكتر وسيلة بتجيب نتيجة على مدار التاريخ "فرق تسد "
فعشان كدة بفكركم وبفكر نفسي
يسقط يسقط حكم العسكر !