الدالي يجهز الجزء الرابع والخامس ونونة وكيد النسا ومواطن اكس جزء ثاني

واضح ان نجاح مجموعة من المسلسلات الرمضانية خلي المنتجين واسرة العمل انهم يمطوا في احداثها ويعلموا اجزاء جديدة منها للسنة اللي جاية وفي البداية كان مسلسل "كيد النسا" واللي اعلنت بطلته سمية الخشاب ومؤلفه حسين مصطفي محرم انهم حيقدموا جزء تاني من المسلسل السنة اللي جاية لان احداث المسلسل ماخلصتش والصراع بين الضرتين سهير وفيفي بيستحق اكتر من جزء .
وكمان اكد المؤلف فتحي الجندي انه بيستعد عشان يكتب الجزء التاني من مسلسله الكوميدي "نونة المأذونة " وده لان فريق العمل حابين يعملوا جزء تاني لان احداث المسلسل بتتحمل انهم يناقضوا قضايا تانية وكتيرة في الجزء التاني زي ارتفاع نسبة الطلاق والعادات والتقاليد الخاصة بكل محافظة من محافظات مصر في الزواج.
وبسبب الاحداث السياسية في مصر اتشجع المؤلف وليد يوسف انه يكتب جزأين جداد وهما الرابع والخامس من مسلسل "الدالي"اللي بيقوم ببطولته نور الشريف وبعد العيد حيكون فيه جلسات عمل بين المؤلف والمنتج محمد فوزي عشان يشوفوا اذا كانت الاجزاء الجديدة دي حتنجح ولا لأ .
ومن ناحية تانية اعلن المؤلف محمد ناير انه حيستعد بعد العيد عشان يكتب الجزء التاني من مسلسل "المواطن اكس" بعد النجاح اللي حققه المسلسل خصوصا وانه فيه قصص لمجموعة من الابطال لسه ماخلصتش وفيه عدد كبير من الاسئلة اللي كتبها ليه الجمهور عن نهاية ابطاله في المسلسل .