محمد زايد يكتب | صاحبي مات

نفس الأسم ونفس السن ونفس الحدث هو اللي بيخليني دلوقتي أكتب ولتاني مرة في نفس الموضوع ,موت شخص قريب منك أكيد صعب رغم ايمانا بأن عند ربنا أكيد في مكان أحسن وبعيد عن الدنيا بمشاكلها وهمومها, لكن دايما بنرجع نقول أن الفراق صعب ..صعب أوي ..لأ ده بيكسر ويعري الضهر .
من 3 سنين لما فكرت أكتب كان اللي كتبته بنفس العنوان ( صاحبي مات ) وده عشان كان في الوقت ده أكتر من شاب في سني وأكبر وأصغر ماتوا تقريبا في أقل من 3 شهور ورا بعض , كلهم كنت أعرفهم بشكل أو بآخر حتى لو مكنتش شوفتهم قبل كده فأنا أعرف أسمهم كويس .
أكتر حاجة كانت بتخوفني وقتها ..أني لما كنت بقابل حد مشفتوش من زمان وألاقي وشه متغير وكلامه وطريقة حياته اللي كنت متعود أشوفه عليها ..فيكون السؤال مالك يابني ومختفي ليه من زمان ؟ فتكون الأجابة : أصل صاحبي مات
الكلمة دي بحس بعدها بشلل في لساني مش بعرف أتكلم بعدها لدرجة أني أوقات بخاف يكون شكلي وحش لأني معزتوش ولا قولتله شد حيلك أو أي كلام من اللي بيتقال في المواقف دي , أصل صعب أوي أنك لما تعرف أن في حد في سنك وشبهك وطولك ودماغك ..مات!!
يعني أنت ممكن وانت ماشي أو انت نايم أو وانت بتقرا كلامي دلوقتي ببساطه ...تموت ,بعد الشر ..طيب ازاي بعد الشر يعني لو هو بعد عني ..يروح لواحد تاني .,يعني أنا مش بتمنى الشر لنفسي بس بتمناه لغيري ..عادي يعني !!
دايما لما بفوق من صدمة الجملة بتاعت ( صاحبي مات ) بيجي أول سؤال على لساني : هو مات ازاي ؟!
والأجابة المحفوظة : حادثة وممكن تتنوع ساكتة قلبية , مات فجأة كده
تاني الرعب بيدخل في كل حتة في جسمي ...والأفكار كلها تدور في دماغي وأنفصل عن العالم اللي حواليا وكأنهم فيديو شغال قدامي من غير صوت ومفيش صوت غير اللي جاي من دماغي ..
على فكرة أنا كمان ممكن أموت دلوقتي لأن في ناس كتير ماتت أهه في نفس سني وعمر ما كان حد يتخيل انهم هيموتوا في يوم من الأيام ,يبقى ليه لأ !!! طيب أنا لو مت دلوقتي هدخل الجنة ..قصدي يعني أنا عملت في حياتي حاجه كويسه !! آه الحمدلله أنا كوبس وبصلي، بس اللي في دماغي إني مينفعش أمونت دلوقتي!!!! ..أصل ما صلتش المغرب ولا العشا وكدبت في الشغل وقولتلهم أن أنا كنت تعبان عشان كده أتأخرت النهاردة ..وشتمت الراجل اللي كان هيخبطني بعربيته في الشارع الصبح ورديت بقلة ذوق على أمي ومتخانق مع واحد صاحبي ومش بنتكلم بقالنا 6 شهور وأنا الغلطان وبقاوح وأصلا أنا في ايدي سيجارة دلوقتي وعيني كل شويه على بنت في المكان ..يا نهار أبيض دي كلها معاصي وذنوب ولا عمري أخدت بالي منها ولا حسبتها جريمة يعني!!
طيب أمال الناس اللي بتموت وهي سكرانه أو بتموت بسبب أوفر دوز ( جرعة زيادة من المخدرات ) أو كان لسه في علاقة غير شرعية مع واحدة , أنا عارف أن كلها ذنوب ومهما اختلف حجمها أو عقوبتها هي في الآخر ذنب طيب ما أنا سمعت قبل كده أن البنآدم يوم القيامة بيبعث على مات عليه ,يعني لو مت وأنا بقرأ قرآن هبعث يوم القيامة وأنا بقرأ قرآن ولو مت وأنا بزني هبعث يوم القيامة وأنا بزني !!!
المشكلة في النسيان..المشكلة في التوهان في زحمة الحياة وبعد كده بننسى ..بننسى اللي هزنا من جوا وتعبنا وخلانا نكتئب , الا ناس قليلة بتخرج من الأزمات دي أكبر و أقوى ايمانا وهدوء , وده بيكون بسبب التزامهم وايمانهم وقوة شخصيتهم .
يمكن بعد الكلام د ه أكرر أي فعل غلط ويمكن لأ بس أعتقد أن أحسن ختام لكلامي ده هو دعاء أرجوا أن كل اللي يقرأ يدعيه من قلبه .. اللهم ارزقنا حسن الخاتمة ...اللهم ارزقنا حسن الخاتمة ...اللهم ارزقنا حسن الخاتمة ....اللهم ارزقنا حسن الخاتمة.