عفروتو:"محدش عبّرني من الأهلي .. ولم أوقع للزمالك"

وجه مصطفى محمود "عفروتو" انتقادات حادة لمسئولي النادي الاهلي ولاعبيه بسبب تجاهلهم له رغم التقارير التى ربطته بالانتقال لنادي الزمالك.
وقال عفروتو في مداخلة هاتفية لبرنامج "كورة النهاردة" على قناة مودرن سبورت لدى سؤاله حول توقيعه لنادي الزمالك :"أنا لم أوقع لنادي الزمالك حتى الآن, وأنا ممكن اوقع لاي نادي في شهر يناير المقبل".
وأضاف:"محدش في النادي الاهلي عبّرني لا لعيبة ولا مسئولين ومحدش بيسأل عني خالص, وانا اللى يقدرني اقدره, ومش عايز جماهير النادي الاهلي تزعل مني, انا عملت اللى في وسعي علشان استمر مع النادي الاهلي طوال 15 عاما, وفي النهاية محدش عبّرني خالص حتى بعد الانباء التى اشارت إلى توقيعي لنادي الزمالك".
وتابع:" كلهم بيشبهوني بإبراهيم سعيد, وأنا شرف ليا اكون زي ابراهيم سعيد, ومش عارف ليه انا مظلوم في النادي الاهلي اللى عمال يتعاقد مع لاعبين اقل في المستوى ويتجاهل ابناء النادي اللى قضوا عمرهم بين جدرانه".
وانتقد عفروتو زملاءه في الفريق لعدم السؤال عنه قائلا:"محدش يعرف حاجة عني وانا خلاص قربت انفجر من الغضب, وزهقت من التجاهل, والى الان لم استقر على الخطوات المستقبلية لكن اللى اعرفه اني اقدر اوقع لأي نادي في شهر يناير المقبل, واللى حيقدرني أنا حقدره, واللى مش حيقدرني أنا مش حقدره".
وأجرى سعد سمير لاعب الاهلي المعار الى المقاولون العرب مداخلة هاتفية اكد فيها على تجاهل الاهلي لشبابه بشكل "يغيظ" وأن بعض المسئولين في النادي الاهلي أبعدوه عن لقاء المدرب البرتغالي مانويل جوزيه وبمجرد وصوله لتدريب الفريق بعد اقالة عبد العزيز عبد الشافي اجبروه على التدريب مع فريق الشباب.
وقال سمير:" أنا زي الناس سمعت إن جوزيه قال على مستواي كويس بعدما شاهدني في مباريات مع المقاولون العرب, لكن لم يفاتحني أي شخص حول مستقبلي, ولو مش عايزيني يسيبوني امشي واشوف حالي احسن بدلا من التجاهل اللى بنشوفه".