رافضو مليونية الثلاثاء: إذا كنت عاطل ومراتك قرفاك اذهب فورا إلى التحرير

أمام الدعوات المطالبة باستمرار الاعتصام في ميدان التحرير حتى يوم غد الثلاثاء، انقسم مشتركو موقع الفيسبوك إلى قسمين قسم يؤيد مليونية الغد ويرى أنها الحل للتسريع بتنفيذ المطالب، وقسم يراها على أنها خطوة في تخريب مصر وإدخالها في نفق مظلم.
القسم الرافض للمليونية، استند في حجته على عدة نقاط أهمها ان المعتصمين بالتحرير بلا عمل أو فائدة وأنهم ليسوا فقط يضيعون وقتهم بل يتسببون في تعطيل الآخرين عن أعمالهم، ومن بين هذه الآراء الرافضة ننشر لكم الآتي:
محمد ملهم:" اذا كنت عاطل وبدون وظيفة اذا كانت مراتك قرفاك فى عيشتك ومش طايق تروح واذا كنت تشعر بالوحدة وتريد الالفه واذا كنت من بلد بعيده وفاتك القطار واذا كنت متسول وبتشحت واذا كنت بتبيع على الارصفة بضاعتك واذا كنت خلصت امتحانات ومفيش نادى مشترك فيه واذا كنت عازب تبحث عن عروسة اذهب فورا الى ميدان التحرير".
عبدالله محمد سيد سعيد: "تحيه واعزاز إلي قواتنا المسلحة الذين يفكرون في صالح مصر من المكر بها ومشروع الشرق الاوسط الكبير ان مصر في خطر شديد لولا وطنيه القوات المسلحه والسياسيين الشرفاء في مصر، امريكا وإسرائيل بيلعبوا في كل اتجاه لتخريب مصر ارجو من الله حفظ مصر ورجالها البواسل رجال القوات المسلحه وحفظ شعب مصر من الثوار الجدد ودعاه الفوضى الذين يريدون تخريب مصر بغلق مجمع التحرير وقطع الطرق وتعطيل مصالح العباد والبلاد..".
موني محمد:" طب احنا ممكن نغير من نفسنا الاول مش معقول احنا هنتغير بالاعتصامات؟؟!".
أما الجانب المؤيد، فقد وجه لومه الشديد للمجلس الأعلى للقوات المسلحة واتهمه بالتباطؤ في تنفيذ مطالب الثورة وجلب حقوق الشهداء والمصابين، وفيما يلي أهم التعليقات المؤيدة لاعتصام التحرير ومليونية الغد، على صفحات الفيس بوك:
أيمن عباس: "انا مش قادر افهم الناس اللي زعلانه من الاعتصام دي بتفكر ازاي وشايفه ايه احنا مش شايفينه دي بقت حاجه تعصب والله وكأن المجلس العسكري يتبني مطالب الثوره علي انها افكار مقترحه للتطوير وعليه الاختيار بينها للتنفيذ وليس علي انها مطالب مشروعه ثابته غير قابله للنقاش او التفاوض وتنفيذها واجب علي من وضع نفسه في الموقع التنفيذي بقول لكل واحد شايف انه الثوره كملت ومش عاوز يعتصم انت مش عايش معانا يا افندي".
أحمد أبو الفتح: " اللى بيقول نثق فى المجلس العسكرى ونتحاور ونتناقش ده يا اما اخوانى بيحب المجلس العسكرى واما مش عايش فى البلد. و الدليل ان مع الاعتصامات زادت اخبار المحاكمات ورجعنا نسمع عن مبارك تاني رايح محكمه جنائيه سيبوكم بقي من لبانه عجلة الانتاج والكلام الماسخ ده عجلة انتاج ايه احنا بندي غازنا لاسرائيل برخص التراب ولو كان الاعتصام واننا نجيب حقنا اجندات امريكية وتخريب فأنا عميل امريكي وافتخر علي الاقل مش بنافق حد".
محمود قطب: "والله الشعب يريد تغيير التغيير . ليه الناس كلها ما تقعدش مع بعضها . الحركات المشاركة حاليا هى الاساس ليه لسه بيتعاملو على انهم معارضة . الكلمة للميدان واللي مش معاها هو المعارضه".