نشطاء يطالبون النائب العام بقرارات تعيد حقوق الشهداء والمصابين

"بيقولوا المواقع الإباحية هتغلق، ما الإعلام المصرى أهو شغال زى الفل، بطلوا إشاعات بقى يا جدعان".. بهذه العبارة الساخرة استقبلت منصات التواصل الاجتماعى قرار النائب العام المستشار عبد المجيد محمود بغلق المواقع الإباحية الذى بدا محيرا لجمهور فيس بوك وتويتر على السواء، خاصة أنه يأتى فى الوقت الذى يتعطل فيه العديد من القضايا الخاصة بالفساد وحق الشهداء.
واستقبلت منصات تويتر وفيس بوك قرار النائب العام كالتالى:
عبد المنعم محمود: يعنى النائب العام اللى القوى "المدنية" بتسانده يبوظ قضايا الشهداء ويطلع القتلة براءة.. يستشيخ علينا ويطلع قرار بحجب المواقع الإباحية.
وائل وهيد: الموقع الإباحى الوحيد فى مصر هو موقع النائب العام.
نادية البدوى: يا سلام عليك يا مصر. أهوه دلوقت حاحس بالأمان لما تحجبى عنا المواقع الإباحية. الأمن والأمان جم مصر يا ولاد. بلى إصلاح شرطة وقضاء وتعليم وصحة.
جمال عيد: متى سيصدر النائب العام قرار بإحالة من قطع الاتصالات للمحاكمة فى قضية لها 20 شهر، مثل قرار حجب المواقع الإباحية؟ بالمناسبة هيه إيه إباحية؟.
كريم فريد: الكارثة ليست فى إغلاق المواقع الإباحية...الكارثة فى تعريف المواقع الإباحية: "ما تتعارض مع تقاليد الشعب المصرى والمصالح العليا للدولة"!!.
دولى عمارة: القضاء حكم بحجب المواقع الإباحية زى الرهوان، إنما حكم يريح قلوب أهالى الشهداء متلاقيش. حكم للى فقدو نور عيونهم مفيش.
محمد حمودة: أنا أرى مشهد طفل يأكل من الزبالة ومستشفى بلا أجهزة مشهد إباحى كامرأة عارية لا يختلف كثيرا.
شيماء الدسوقى: الشاب لو لاقى شغل وجواز هيدخل على المواقع دى ليه؟ الطلبة لو ليهم أنشطة تشغلهم بدل من الإجازة 3 شهور هيعملوا كده ليه؟
وفى تفاعل مختلف مع القرار يرى البعض أنه رغم أهميته إلا أنه قد يكون عديم الفائدة لعدة أسباب:
فاضل حسين: ليس هناك جدوى من حجب المواقع الإباحية لأن آلاف السى ديهات تباع بأبخس الأسعار على الأرصفة ومع البائعين الجوالين، والمكتبات.
لؤى العيسوى: عمر الحجب ما هيجيب نتيجة لأن اللى عايز يوصلها مش هيغلب. المطلوب التعليم والتربية والوعى عشان كل واحد ياخد قراراته بنفسه.
ياسر السيد: وإيه يعنى لما يقفلوا المواقع الإباحية على النت وإيه يعنى.. احنا عندنا السبكى والعدل جروب أسلوب حياة.
الموقف نفسه اتخذته منى سيف فى تغريدتها على تويتر، إلا أن تخوفها ارتبط بسبب آخر عبرت عنه قائلة: "أيا كان إنت بتحب أو بتكره المواقع الإباحية، لو ارتضيت بالحجب لأى سبب، ممكن يستخدم بعد كده لحجب مواقع أخرى زى مواقع المعارضة".
مؤيدو القرار
"مش بعيد نلاقى ناس طالعة تطالب بالحرية وتندد بحجب المواقع الإباحية.. على فكرة بكره نلاقيه واقع مش خيال".. تغريدة دافع بها أنس أكرم الشاعر عن قرار النائب العام بغلق المواقع الإباحية.. فيما كتب أحد شباب فيس بوك ساخرا من الرافضين للقرار" مظاهرة حاشدة لليبرالين والعلمانين وامتلاء ميادين مصر بالملايين اعتراضا على غلق المواقع الإباحية.. وتتعالى الأصوات.. عيش.. حرية.. مواقع إباحية، يالى ساكت ساكت ليه هاردك مليان ولا إيه؟".
مصطفى: نسبة كبيرة من الشعب المصرى يشاهد المواقع القذرة دى لما نلاقى فى خطوة جيدة لحماية الأجيال اللى جاية من الفساد ده إيه اللى يزعلنا فى كده دى الأطفال فى المدارس معاهم أفلام على التليفونات هو ده الجيل اللى طالع بقى لا حول ولا قوة إلا بالله - خطوة جيدة مش عارف ليه زعلانين.
شيرى مون: الصح صح المفروض كان اتطبق من زمان حتى لو فيه قضايا مهمة تانية أو أهم فى الوقت الحالى بس ده مايمنعش إنه قرار صحيح فى وقت محتاجينه جدا فيه.