وداعا كعك العيد.. أصحاب المخابز يصرخون والغلابة يكتفون بالمشاهدة

كشف تقرير صحفي اليوم الثلاثاء، أنه مع اقتراب عيد الفطر، ارتفعت أسعار الكعك والبسكويت بنسبة 50% مقارنة بالعام الماضى، في ظل السياسة الفاشلة لإدارة الانقلاب.
وأظهر التقرير تفاوت أسعار الكعك والبسكويت من محل لآخر، إلا أنها بدأت فى بعض المناطق ما بين 60 و64 جنيهًا لكيلو البسكويت، والكعك من 70 إلى 80 جنيهًا للكيلو ما بين كعك سادة ومحشو بالملبن والعجوة وآخر بالمكسرات وعين الجمل، والبيتى فور ما بين 80 و120 جنيهًا للكيلو الواحد، فى حين تراوحت الأسعار فى المناطق الشعبية والمتوسطة من 45 إلى 60 جنيهًا لسعر كيلو البسكويت، ومن 50 إلى 60 جنيهًا لكيلو الكعك، ومن 50 65 لكيلو "البيتى فور".
ونقل التقرير المنشور على صحيفة "الوطن" عن مواطن يدعى محمد إبراهيم، 32 سنة، أنه منتظر قدوم الزبائن التى تأتى بين الحين والآخر للسؤال عن أسعار الكعك والبسكويت، يقول: "الكل بييجى يسأل عن الأسعار بس لكن مفيش حد بيشترى والستات لما بتلاقى سعر الجاهز غالى بتمشى، حتى الناس اللى كانت بتيجى تعمل فى الفرن مخصوص مابقتش تيجى".
وأضاف: "زى اليومين دول كده ماكناش بنريّح رجلينا بسبب الزحمة، ونفضل طول اليوم ما بين العجن والتسوية والبيع للناس، لكن دلوقتى كل فين وفين لما ييجى زبون ياخد حاجة، واللى بيشترى بيكتفى أنه ياخد يا إما بسكويت أو كعك".
وتابع: "أسعار المستلزمات زادت الضعف والبضاعة اللى كنا بنجيبها ب10 آلاف جنيه دلوقتى تكلفنا 20 ألف جنيه، عشان كده والدى ماعملش نفس الكمية اللى كنا بنعملها كل سنة لأن مفيش حد بيشترى رغم أن الموسم بدأ".
فيما قال مواطن آخر يدعى حمادة الأسيوطى وهو صاحب مخبز 31 سنة، "فيه ناس بتحب تعمل فى بيتها وتيجى هنا تسويه، لأن درجة الحرارة عندى بتكون مظبوطة والصيجان متوفرة ليهم، فبعد الفطار على طول المحل بيكون كله سيدات وكل واحدة بتكون معاها واحدة واتنين عشان يقطعوا البسكويت وممكن يفضلوا للفجر، وفيه ناس بتجيب لى السمن والدقيق وباقى الطلبات وأعمل ليهم حاجة مخصوص، وفيه ناس بتستسهل وتشترى جاهز".
ويتذكر حين كان الأهالى يقومون بحجز كعك العيد والبسكويت قبل بداية شهر رمضان ب10 أيام، بجانب العرائس التى كانت تحجز كميات كبيرة من كافة الأنواع فى رمضان، إلا أن ارتفاع الأسعار هذا العام، أجبرهم على التراجع عن تلك العادة.
وتابع: "قبل ما الشهر يبدأ كنا بناخد طلبات من الناس إننا نعملهم وكانت كميات كبيرة، وفيه اللى كان بيجيب لينا الطلبات واحنا نعمله ليهم مخصوص، ده غير العرايس كانت تحجز ب50 و60 كيلو مشكل، السنة دى قليل جداً اللى حجز ومش بيحجزوا أكتر من 20 كيلو مشكل، لأن العروسة مبقتش زى زمان توزع على الجيران بسبب الأسعار اللى زادت".
وأكد أن "الأسعار زادت الضعف، كان البسكويت سعره يتراوح ما بين 16 و40 جنيهًا للكيلو، السنة دى من 27 ل60 جنيهًا، الكعك كان أغلى نوع ب30 جنيهًا الكيلو، لكن دلوقتى بنبيعه ب50 و60 جنيهًا، البيتى فور كان من 25 جنيهًا لحد 40 جنيهًا، السنة دى وصل ل55 جنيهًا للكيلو، الغريبة كانت ب35 للكيلو، النهارده وصل سعر الكيلو منها ل50 جنيهًا"، مشيراً إلى أنه اضطر إلى خفض الكمية التى اعتاد إحضارها كل عام إلى أكثر من النصف خوفاً من عدم بيعها هذا الموسم، خاصة أنه يقوم بشراء المستلزمات من التجار بالتقسيط ويقوم بسدادها طوال الشهر.
ويرتفع سعر المخبوزات في المناطق الراقية حيث سجل سعر كيلو البسكويت من 48 إلى 64 جنيهًا، بينما ارتفع سعر الكعك من 48 ل75 جنيهًا للكيلو السادة، ول120 بالنسبة للكعك بالمكسرات، والبيتى فور من 52 ل80 جنيهًا للكيلو.