عم «أبوجبل» باكيا بسبب خسارة المنتخب: متزعلوش.. وهنتأهل لكأس العالم

علق الحاج علي أبو جبل، عم اللاعب محمد أبوجبل، على أداء المنتخب المصري أمام السنغال وأداء ابنه حارس المرمى «أبوجبل» وهو متأثر بالدموع، قائلا: «أداؤهم بخير وكويس، وكتر خيرهم بس أمر الله كده، كنا عاوزين نفرح أكتر من كده ويجيبوا هدية لمصر كلها مش إحنا بس».
هحتفل ب«أبو جبل» في كل وقت
وأضاف «أبو جبل»، خلال لقاء ببرنامج «مساء dmc»، المذاع على شاشة قناة «dmc»، وتقدمه الإعلامي إنجي القاضي، «أنا فخور بأبو جبل وفخور بهم كلهم والله، لأنهم أولادنا كلهم مش غُرب علينا، لله الحمد والشكر أدوا اللي عليهم ومعلش النصر بكرة جي ومتزعلوش يا ولادي ويا أهل مصر».
وتابع: «عاوز أشجعهم وأقولهم شد حيلكم، وهحتفل بأبوجبل في كل وقت، وإن شاء الله هنخش كاس العالم، وربنا معاهم ويرجعوا بالسلامة، هما أدوا ما عليهم ويشكروا وكتر ألف خيرهم».
واشار إلى أن كل أفراد المنتخب على قلب رجل واحد، وليس فقط ابن أخيه «أبوجبل»، متابعا: «مش أبو جبل بس، أبو جبل فرد من أفراد، وكلهم على قلب رجل واحد، ومصر كلها كانت معانا، بس النصيب».
هنوصل كأس العالم وهنتأهل
من جانبه قال خالد أبو جبل، عم اللاعب محمد أبوجبل، إن أداء كل اللاعيبين كان مشرف في بطولة أمم أفريقيا، «الكورة مكسب وخسارة، وقدر الله ما شاء فعل، وإن شاء الله ربنا ينصرهم وخيرها في غيرها».
وأضاف «أبو جبل»، خلا لقاء بنفس البرنامج، «إن شاء الله هنوصل لكأس العالم وهنتأهل، وابننا عمل اللي عليه وزيادة، لكن هي الكورة كدة، مكسب وخسارة، ومقصرش في أي صدة».
ووجه رسالة للاعيبين، قائلا: «أقولهم الكورة مكسب وخسارة، والنهاردة مكنش عندنا حظ، بس إن شاء الله يجيلنا في كأس العالم».