حمو بيكا: «مراتي لما بتغير بتكسر البيت.. الله يخربيت أم الموبايلات»

خصص الإعلامي أحمد سالم، حلقة اليوم من برنامج «لحظات جريئة»، الذي يُعرض على شاشة «القاهرة والناس»، للحديث عن الغيرة، فقال حمو بيكا، مغني المهرجانات، : «مراتي بتغير.. ده شيء أساسي، لما تغير ممكن تكسر الدنيا، وتقعد تكسر كل الحاجات اللي موجودة في البيت».
وسأله «سالم» عن سبب غيرة زوجته عليه، فرد قائلا: «ما أنا مش بصلي على السجادة، لازم أكون عملت حاجة كده ولا كده، بس هي بتقعد تدور في أي حاجة قديمة، أنا مش بتضايق من كده، مراتي غلبانة وهي وش السعد عليا ووش الخير عليا، بس منه لله تفتيش الموبيلات، الله يخربيت أم الموبيلات، أنا عملت الباسورد مؤخرا بس بعد فوات الأوان، كنت اتقفشت ييجي 20 ألف مرة، وأنا مش بحرم».
من ناحية أخرى، قالت الفنانة نسرين أمين، خلال حوارها في نفس البرنامج: «أنا بغير أوي وعلى الآخر، غيرتي لا فيها عقل ولا تفكير، بس طبعا لو فكرت بالعقل هيبقى أحسن، الغيرة بتبقى غصب عني، بس ملهاش علاقة بالثقة، الغيرة دليل على الحب والاهتمام، كنت لما بغير بعمل خناقات معاه مش مع الطرف الثاني، بلم الموقف عشان منظري قدام الناس».
فيما قالت الفنانة رانيا فريد شوقي، إنها لا تغير لدرجة الجنون، مؤكدة: «عندي ثقة في نفسي، الموضوع بالنسبة لي عادي، اتعلمت من أمي اللي كانت متجوزة فريد شوقي، يعني معجباته كتير، أمي قالت لي متلمويش الراجل على تصرف ست هي اللي عملته، تلوميه على رد فعله، يعني بابا ممثل لو واحدة أخذته بالحضن وباسته هزعقله ليه، لو فضل قافش في الحضن يبقى الموضوع مختلف».
في السياق ذاته، قالت الفنانة دينا عبدالعزيز: «بغير على جوا يعني بتناكة، ومش بحسسه إني غيرانه، لو فيه حاجة شيفاها أوفر بغير بقى على برا، بس برضوا بيطلع العتاب بكبرياء فظيع».
ولفت مفيد فوزي، إلى أن عبدالحليم حافظ كان يغير بشدة على سعاد حسني: «كان بيكلف سواقة يجيب له أرقام سيارات اللي واقفة كلها في مدخل عمارة من العمارات في شارع ما، لأن سعاد حسني كانت بتلعب ورق في بيت أحد المخرجين، وكان عاوز يعرف مين اللي كان هناك، ورق من غير فلوس مش قمار، وكل سيناريو اشتغلت فيه هو قرأه من باب اهتمام، أما سعاد حسني فلم تغير على العندليب سوى من ميرفت أمين».