نسمة محجوب عن كواليس أغنية «حكاية شعب»: كلماتها فيها رهبة

كشفت المطربة نسمة محجوب كواليس أغنية «حكاية شعب»، والتي أذيعت ضمن فعاليات نقل المومياوات الملكية من المتحف المصري بالتحرير للمتحف القومي للحضارة المصرية بالفسطاط، قائلة «مشفتش ولا عرفت ضخامة العمل إلا لما اشتركت فيه، وكنا في البروفات الأخيرة شوفت أد إيه الناس بتركز على كل تفصيلة وكل حركة وكل ثانية عشان الموكب يبقى ماشي مع المزيكا».
وأضافت «محجوب»، خلال اتصال هاتفي ببرنامج «التاسعة»، المذاع على شاشة التلفزيون المصري، «الشغل اللي عمله المايسترو نادر عباسي من أعظم المايستروهات اللي اتعاملت معاهم على مدار حياتي ويستاهل أنه يبقى في المكان ده على دقته وحماسه للعمل وشغفه، وكلنا كنا بنحاول نبقى مركزين جدا ونفصل كل حاجة زيه، فكان شغل كبير أوي وبروفات كتير وناس كتير تعبت».
وأوضحت أن كلمات الأغنية بها رهبة كبيرة للغاية، وإحساسها وقت الحدث اختلف تماما رغم كثرة البروفات قبلها، وكل شخص يرغب في إظهار أفضل ما عنده، «التركيز مع الحدث قبلها خلانا كلنا شايلين حمل على كتافنا كبير أوي ومهما عملنا من بروفات أول لما طلعنا على المسرح كان فيه اهتزيناها».
وتابعت: «كنا عاوزين نوري العالم أننا نقدر نعمل حاجات بمستوى عالمي ونقدر نهز الكون لو أحنا عاوزين، ولو حطينا نفسنا في الموضوع واشتغلنا بضمير أوي كده زي الاحتفالية في كل حاجة أحنا هنقدر نبقى مؤثرين في العالم، وأحنا كده كده مؤثرين في العالم».
وأشارت أن فستانها من تصميم فريدة تمراز، وهي من صممت أيضا فساتين المطربات بالحفل، «بشكرها على الجمال اللي طلعتنا به».
وشهدت مصر نقل موكب المومياوات الملكية مرورا بصينية ميدان التحرير، ثم الاتجاه إلى ميدان سيمون بوليفار، بمحاذاة الكورنيش حتى الوصول إلى متحف الحضارة المصرية في الفسطاط، وسط تأهب كل أجهزة الدولة المصرية لإنهاء كل الاستعدادات المتعلقة بالموكب.