كاملة أبوذكري عن وجود جزء ثان ل«ب 100 وش»: أحنا أقرب لفيلم

تحدثت المخرجة كاملة أبو ذكري، عن احتمالية وجود جزء ثاني من مسلسل «ب 100 وش»، قائلة إنها تشعر بالقلق عن الجزء الأول من الإهانة أو كسر نجاحه إذا تم عمل جزء ثان له، مشيرة إلى أنه إذا كان هناك سيناريو قوي وأقوى من الجزء الأول يمكن هنا عمل جزء ثاني له، وألا يكون فقط مجرد تكرار، «النكتة لو قولتهالك مرتين مش هتضحكي عليها، أول مرة هتضحكي، تاني مرة هتبتسمي، وتالت مرة هتقولي خلاص، بس أحنا أقرب لفيلم لما أقعد مع الكتاب ونلاقي الفكرة وممكن منلاقيش».
وأضافت «أبو ذكري»، خلال لقاء ببرنامج «معكم منى الشاذلي»، المذاع على شاشة قناة «cbc»، وتقدمه الإعلامية منى الشاذلي، «أحنا وصلنا فعلا مع بعض وابتدينا نلمح فكرة وكتبناها في معالجة وقدمناها للأستاذ جمال العدل عشان ناخد موافقة الرقابة، وتقريبا قالوا أوك، بس انشغل في مسلسلات رمضان، فقولنا نأجله لانشغالهم بمسلسلات رمضان».
وعن البوست المثير للجدل عن نجوم «ب 100 وش»، أوضحت المخرجة: «أنا اتضايقت من نفسي بسبب البوست ده، أنا مليش دعوة، كل واحد حر، اللي عايز يبقى مغرور يبقى، واللي عايز يتواضع يتواضع، أنا حبيتهم وأدركت حجم موهبة ممثلين 100 وش، أنا اتضايقت من البوست، عشان أنا كنت ممكن اتكلم في التليفون بدل دوشة السويشال ميديا».
وقالت المخرجة كاملة أبو ذكري، إن قرارها بالانسحاب من مسلسل «زي الشمس» هو أحلى قرار أخذته في حياتها، متابعة :«أنا صورت أول 10 حلقات من زي الشمس وحضرت كل المسلسل والملابس، ولكن بعدها حسيت إني مش عايزة أهزق نفسي، عندي أقعد في البيت ولا أهزق نفسي، أنا اضطريت أسيب المسلسل، لأن وجودي كان مضايق ناس، فكان لازم أمشي، هما اضطروني أمشي، ودي تجربة لا تخصني».
وواصلت: «تحية لكل ست متخفش وتقدر تحقق نجاح في الحاجة اللي بتحبها أي كان بدون تنازلات أو تحسي إنك قليلة عشان كونك بس ست».