"كلهم ولادي".. سر آية قرآنية على صورة شهيد مسيحي من رجال "منسي"

"وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا ۚ بَلْ أَحْيَاءٌ عِندَ رَبِّهِمْ يُرْزَقُونَ".. آية قرآنية بجوار صورة شهيد من شهداء الكتيبة 103، معلقة على جدار منزله، وهو الشهيد عماد أمير يعقوب، استشهد بصحبة العقيد أحمد منسي أثناء محاربة الإرهاب، والدته ووالده جمعوا صور الشهيد مع زملائه ومن بينهم العقيد منسي، وزينوا حوائط المنزل بها، بجوار صور السيدة العذراء والمسيح.
"الوطن" التقت والدة الشهيد، التي روت حكاية من كنوز التضحية في سيناء، وتحديدا من بطولات الكتيبة 103 صاعقة، وأظهرت المواقف الإنسانية التي فعلها الشهيد منسي مع والدة الشهيد عماد.
تقول أم الشهيد عماد ل"الوطن": "إحنا أسرة من 5 أشخاص، الشهيد عماد أصغر أولادي، من وهو عنده 10 سنين كان نفسه يروح الصاعقة، حتى فى عيد ميلاده اشتريت له بدلة صاعقة، بعد ما خلص مرحلة تعليمه التحق بالقوات المسلحة، وكنا بنروحله زيارة قبل ما يتنقل سيناء".
وتضيف الأم: "ابني كان بيعرف يسوق، وربنا كتب ليه الخير إنه يبقى السواق بتاعت عربية المداهمات الخاصة بالعقيد أحمد منسي، وده أخوه الكبير مش القائد بتاعه"، وعن سر وجود صورة الشهيد بجوار الآية القرآنية، قالت الأم "الجميع شهداء، والدين لله.. وسواء مسلم أو مسيحي كلهم شهداء بيدافعوا عن بلدنا".
وتروي أم الشهيد عماد أول واقعة اتصال بينها وبين العقيد أحمد منسي، قبل استشهاده ب 5 أشهر تقريبا "كان في فرح بنت أختي، واتصلت بابني عماد يحضر، واستأذنته إنى أكلم العقيد منسي يسمحله بإجازة، وكانت المكالمة: "أيوة ياباشا، أنا أم عماد، فرد عليا "متقوليش ياباشا، أنا زي عماد، واسمي أحمد منسي يا أمي، أؤمريني عاوزة إيه؟" قولتله يا ابني عاوزة عماد تسمحله ينزل يحضر فرح بنت أختي والنبي علشان خاطري، فرد عليا: يا أمي حاضر، بكرة هينزل ويحضر معاكي".
تضيف الأم: "منسي ده كان ملاك، ده ابني، زيه زي عماد الله يرحمهم وكل أولادي الشهدا اللي كانوا مع ابني"، وتتذكر الأم المكالمة الثانية مع العقيد أحمد منسي: "كان قبل استشهاد ابني ب 20 يوم تقريبا، ودي كانت آخر إجازة لابني، كنا فى الصيف في شهر 6، والعيلة كلها بتتجمع تروح تحضر مصيف، فاتصلت بعماد وطلبت منه يجي يحضر المصيف، قالي يا أمي ماينفعش، قولتله هات أكلم أحمد بيه منسي وهاطلب منه"، وكان مضمون المكالمة: "إزيك يا ابني عامل إيه، ربنا يبارك فيكم ويخليكم لينا كلنا، قالي الله يخليكي يا أمي أؤمريني عاوزة إيه وأنا هعملهولك، وهو بيضحك، قولتله مش هاكدب عليك أنا عاوزة عماد ينزل إجازة ويحضر معانا المصيف مع لمة العيلة، قالي حاضر، ونادى على عماد وقاله تنزل بعد بكرة تروح لوالدتك".
وتكمل أم الشهيد "عماد نزل وقضينا المصيف، ورجع ابني على كتيبته، وقبل استشهاده بساعات جالي اتصال من عماد بيقولي يا أمي انتي وحشتيني، وخلي بالك من نفسك، وردد كلمة بحبك أكتر من 5 مرات، وسمعه القائد أحمد المنسي قاله بتحب في مين ياعماد، فرد عليه والله ياقائد دي أمي، فقال له خليها تدعيلنا".
يذكر أن الشهيد عماد يعقوب هو أصغر شهداء كمين البرث، وكان هو سائق سيارة منسي، وسوف يظهر دوره في نهاية مسلسل "الاختيار" خلال آخر 4 حلقات، وأكد جرجس شقيق الشهيد أن الممثل الذي قام بدور شقيقه تواصل معهم، وروت له والدته التفاصيل التي حدثت.