مرسي متحدثا عن وزير الداخلية الحالي: "ماهواش الظابط اللي حاطينه فى البتاع"

أحمد جمال الدين اتصرف غلط ولم أعاقبه.. ومافيش حد أخد حكم يا بتوع الشرطة

انتقد محمد مرسي، الرئيس المعزول، أثناء حديثه المسجل له من داخل محبسه، الذي تنفرد به "الوطن"، الدعوات التي كانت تتهمه بأخونة وزارة الداخليه، معتبرا أن هذه الدعوات باطلة، وأنه كان يحاول أن يحافظ علي رجال الشرطة، وعدم تقديمهم للمحاكمات، موضحا أن أحمد جمال الدين، وزير الداخليه الأسبق، "اتصرف غلط "، ومع ذلك لم ينله أي عقاب، بل حاول المعزول الاتصال به مرتين ليأخذ بخاطره ...
وإلي نص الحوار :
مرسى : عبدالغفار يروّح، وعبدالحميد عبدالله عايزين حد يرجّعه، لا.. لا..خلاص، اللي عايز يمشي خلاص، قعدت أدور ..أدور عندكم لغاية ما لقيت خالد العبد .. من زمان قولت له تعالى.. قول لى هتطور الجهاز إزاى؟. كمان محمد ده (ربما يقصد اللواء محمد إبراهيم وزير الداخلية الحالى)، قلت فنياً ده ظابط مباحث، بتوع الجنايات دول شطار، وتاريخياً مش حرامى، فقلت كويس. محمود (ربما يقصد اللواء محمود وجدى وزير الداخلية الأسبق) كان حاجة هباب خالص، يعنى متنيل بنيلة، قالوا حاكموه، ولا حاكموه ولا نيّلوه، خَد 3 عربيات بى إم دبليو وهو ماشى، يخرب بيتك انت عايز إيه؟ إنت فاهم إن أنا مش شايفك.
أنا لو ما عملتش كده فى الشرطة، وجبت أشرف لأن أشرف كويس، وماجد كان عايز يلعب برضه، ماجد بتاع الأمن المركزى، جبت أشرف عبدالله، وأشرف كفء، وذكرته بخير فى موضوع الجنود، وهو فى سينا قلت أشرف فين؟، أشرف فى سينا بيؤدى واجب ودور والتانيين الكبار عايزين يزقوهم، قلت ل«محمد إبراهيم» تعال جنبى هنا، عشان الناس تظهر، يقول لك أصل إنت بتأخون، يا ولاد ستين فى سبعين، أأخون إيه؟ وهى دى أخونة؟، انتم بتتكلموا عن إيه؟ أنا باحافظ عليكم، ما فيش حد فيكم اتحاكم، ما فيش حد خد حكم، يا بتوع الشرطة .
- صوت: أحمد بيه جمال ما طوّلش
مرسى: أحمد بيه جمال، اتصرف غلط، ومع ذلك لم ينله عذاب، ما فيش وزير اتصل بيه رئيس الجمهورية مرتين بعد ما خرج زى أحمد جمال بالتليفون، مرتين فى التليفون عشان آخد بخاطره، خلاص شوية حاجات كده، أصل إنت خللى بالك، اللى عايش فى حتة متنيلة، يعنى إنت قاعد فى مستنقع فساد، بينالك منها حظ وجانب، محمد إبراهيم ما كانش فى البتاعة اللى فوق دى أصلاً، أنتم فاكرين محمد كان فين، ومن أسيوط للسجون، ومش عارف فين، يعنى ما هوش الظابط اللى هما حاطينه فى البتاع، وأحمد كان كده، ومع ذلك إديته فرصة.