بالفيديو| "عمري ما لبست فانلة حمرا".. أبرز تصريحات حازم إمام على «DMC»

حل حازم إمام، لاعب نادي الزمالك السابق، وعضو الاتحاد المصري لكرة القدم، ضيفا على الإعلاميتين آية جمال الدين ورحمة خالد، ببرنامج "8 الصبح"، على شاشة "DMC"، صباح اليوم.
ودار الحديث حول استعدادت اتحاد الكرة، بحكم إمام عضو مجلس إدارته، لاستضافة بطولة كأس الأمم الإفريقية، عام 2019، وكواليس الحصول على تنظيم البطولة، وأيضا عن المنتخب المصري وفرصه في الفوز بها، وعن نادي الزمالك والنادي الأهلي، وتطرق الحديث أيضا أيضا لوالده الراحل الكابتن حمادة إمام، وبعض الجوانب الشخصية لحازم إمام، وعلاقته مع بناته.
"كنت محظوظ إن أبويا حمادة إمام"
وقال إمام، إنه محظوظ كونه ابن الكابتن الراحل حمادة إمام، سواء كان لاعب كرة أم لا: "إحمادة إمام يبقى أبويا ده في حد ذاته حاجة كويسة، إن أبويا يكون بالشكل ده والقيمة دي والأخلاق دي، أنا محظوظ، وحظي كان حلو إني طلعت لاعب كرة"، لافتا إلى أن والده كان محبا لكل الناس، وكان يحترم جميعهم، وكان يعامل الجميع بشكل جيد.
وأضاف الثعلب الصغير أن والده الكابتن الراحل حمادة إمام كان يرى أن الكرة هي إمتاع وليست تعصب، متابعا: "مش لازم نشتم بعض علشان نبقى كدا جامدين، كان شايف أساس الكرة إني استمتع بيها، مش ألعب تحت ضغوط".
وشرح إمام أن بالوقت الحالي، يضع الأهالي أطفالهم تحت ضغوط عند ممارستهم كرة القدم، ويقولون لهم: "العب ولازم تبقى أحسن واحد، ده غلط مينفعش تحط ضغط على طفل عنده 6 سنين، ولا 8 سنين، ده طفل وبيلعب وبينبسط".
وذكر: "أبويا عمره ما جالي ماتشات وعمره ما عمل عليا ضغط، ولا كان بيجي يقولي لعبت وحش وكويس، ولما كبرت حسيت إني أخدت راحتي، وأول سنة لعب فيها في الزمالك مكانش بييجي يتفرج عليا ولا يقول للمدرب حازم بيلعب ولا مش بيلعب".
واستكمل إمام: "صحابي دلوقتي ضاغطين على عيالهم وزعيق وبيتخانقوا مع المدربين، وهو اللي بينقل العصبية للأطفال".
وقال حازم إمام، إن السيرة الطيبة تظهر بشكل أكبر وأوضح بعد رحيل الإنسان عن الدنيا، مضيفا: "لما رحل أبويا لقيت الناس كلها بتحبه، والناس بتناديني باسمه في الشارع لحد النهاردة".
وأضاف إمام، أنه لو لم يكن لاعب كرة قدم، كان سيصبح مهندسا، موضحا: "أنا مش مذيع ولا إعلامي، أحب كل حاجة في حتتها، أنا لاعب كرة وبطلع في التلفزيون بخلفية إني لاعب كرة، ومن المهم أن كل الناس تبقى عارفة ده، لأن الإعلامي هو اللي درس الإعلام، أنا بطلع أتكلم في الكرة بس، لكن مقدرشي أطلع أقول آراء سياسية أو اقتصادية".
الدولة وراء نجاح استضافة مصر ل"إفريقيا 2019"
ونوه إمام أن الدولة كانت الجندي المجهول في الجهد الذي بذل كي تفوز مصر بتنظيم كأس الأمم الإفريقية 2019، "الدولة كانت في ظهر اتحاد الكرة بشكل كبير جدا، وهي من دعمت الملف بشكل كبير جدا، وهي التي رغبت في استضافة حدث كبير زي ده، الدولة هي اللي أديتنا الضوء الأخضرعلشان نقدم الملف".
وتابع: "أول مرة البطولة تضم 24 منتخب، كان الأول 16 نادي بس، وأول مرة تبقى في الصيف، بعد ما كانت بتتلعب في الشتاء".
وأكمل: "كابتن هاني أبوريدة اسم كبير في الاتحاد الإفريقي وعنده قوة إقناع كبيرة، مع قدرة مصر الكبيرة كبنية تحتية بشكل عام وليس فقط ملاعب، لأن استضافة 24 فرقة ليست أمر هين، مفيش بلاد في إفريقيا تقدر تجهز لكل ده، ولكن كان في ثقة في البلد إنها تقدر".
"مفيش إلغاء للدوري.. الناس عاوزة تحضر العفريت"
ونفى حازم إمام، ما أثير حول وجود نية لإلغاء مسابقة الدوري العام، شارحا "قولنا 50 مرة مفيش إلغاء للدوري، الناس عاوزين يحضروا العفريت وييجي بجد، الصحفيين بيسألو، حسسوني إنهم عاوزين الدوري يتلغي، ومحدش طرح الفكرة أصلا، لأنه مينفعشي الفلوس دي كلها تتصرف ونيجي نقول نلغي الدوري".
واستطرد: "أتمنى أن يفوز المنتخب بالبطولة هذه الدورة، وخصوصا كون هذا المنتخب استطاع الوصول في آخر بطولة للمباراة النهائية، وفريق المنتخب قوي جدا، ولكن له منافسين أقوياء".
وأشار إلى أن مصر تحتاج لتهيئة الملاعب بشكل جيد والاهتمام بنجيل أرضيتها، لاستضافة بطولة أمم إفريقيا 2019، لافتا إلى أن اتحاد الكرة اتخذ قرارا أول أمس بغلق بعض الملاعب، استعدادا للبطولة.
"الزمالك بيتي.. وعمري مالبست فانلة حمرا"
وقال حازم إمام إنه كان يلعب لنادي الزمالك، وكان يحب النادي جدا، وإذا كان عرض عليه اللعب للنادي الأهلي كان سيرفض.
وتابع: "مهما كان في مغريات أنا اتربيت وسط أهلي وأصحابي في نادي الزمالك، اتربيت في بيتي الزمالك والناس كانوا مقدرني كويس والجمهور، ومن وأنا صغير عمري ما كان عندي فانلة حمراء في البيت، دائما بلبس فانلات بيضاء، فكان صعب أسيب الزمالك".
وأضاف إمام، أن الصفقات التي قام بها النادي الأهلي في شهر يناير ستفيده، قائلا: "كلهم لعيبة كبيرة وكويسين"، موضحا أن النادي الأهلي خسر نهائي بطولة دوري أبطال إفريقيا الأخيرة بسبب أنه لم يكن يمتلك لاعبين على مستوى عالي.
وتابع: "المدرب مكانش وحش.. هو مكانش عنده لعيبة، ونظريتي إن الفرق بتكسب باللاعيبة مش بالمدرب، ولما يكون عندك لاعيبة كويسة، مع مدرب عادي هتكسب، إنما لو مدرب كبير مش معاه لعيبة مش هيعمل حاجة، الأساس هو اللعيبة الكويسة".
وأضاف، أن الصفقات الجديدة ستشكل فارقا كبيرا مع الفريق، وأداء الفريق في الدور الثاني من الدوري العام، وبطولة إفريقيا.
وتحدث عن نادي الزمالك وأداء نادي الزمالك هذا الموسم، قائلا: "عاجبني في نادي الزمالك الهدوء، على عكس المواسم السابقة، وده اللي كان الزمالك محتاجه، وكل يوم في تطور، والمقاصة كان أفضل ماتش للزمالك، وربنا يكرم ويستمر على كدا".
وتطرق حازم إمام لقضية حسم الدوري العام من الآن، "لو لاعيبة الزمالك وصلها إحساس إنها ضمنت الدوري مش هياخدوا الدوري السنة دي، لأن الإحساس ده وصلنا زمان 1995، وكنا راكبين الدوري وما أخدناش الدوري".
وأضاف إمام: "متبقي في الدوري 18 مباراة وأكثر.. ولازم اللاعيبة تعرف إن الدوري مش هيخلص إلا مع فارق النقاط".
وبخصوص لقب "الثعلب الصغير"، المفضل له، قال حازم إمام: "هو أول حاجة قالهالي الجمهور، وده كان بيخليني فخور ومبسوط إني على أد مستوى أبويا، لما يكون الواحد أبوه جامد جدًا، مبنبقاش عاوزين نصغرهم".
وقال حازم إمام، إنه كان صانع ألعاب، ولعب كرأس حربة و"باك يمين"، ولكن مركز صانع الألعاب كان الأبرز بالنسبة له، ولكن هذا المركز لم يعد موجود بشكل كبير في مصر، لأنه أصبح هناك طرق لعب أخرى، وأصبح اللعب على الأطراف يعتمد عليه بشكل أكبر، متابعا: "مبقاش المركز ده مطلوب زي زمان".
وأضاف "إمام"، أنه كان لديه تحفظات على تولي "أجيري" مدير عام المنتخب، ولكنها لم تكن تحفظات فنية، وكانت أسباب أخرى غير الفنيات، ولكنه يؤدي بشكل جيد حتى الآن متمنيا له التوفيق.
"وليد سليمان لازم يكون في المنتخب"
وعلق حازم إمام، على بعض اللعيبة التي تؤدي بشكل جيد ولا تنضم للمنتخب، قائلا: "رأيي وليد سليمان لازم يكون في المنتخب، حتى من وقت كأس العالم، ومحمود علاء، وغيرهم"، موضحا أن المدرب يكون له رؤية تخالف رؤية الجمهور، متابعا: "المدرب بيكون عاوز حاجة والجمهور بيكون عاوز حاجة تانية خالص، ويتوقف ذلك على حسابات المدير الفني".
وقال، إن أفضل لاعبي جيله هو الكابتن حسام حسن، وذكر: "هو تاريخ ولعبت معاه 10 سنين، وجامد في الملعب جدا، ولا يكل ولا يمل"، لافتا إلى أن أصعب مباراة خاضها مع فريق نادي الزمالك كان نهائي دوري أبطال إفريقيا مع الرجاء المغربي: "كان فاينال في ملعبنا وسط جمهورنا وسط ضغط كبير جدا، الماتش ده كان صعب وكانت بطولة مهمة جدا وكبيرة جدا، وعلى مستوى المنتخب كان نهائي جنوب إفريقيا، أما عن أغرب هدف سجله كان أمام الأهلي، ولم يكن يتوقع الهدف".
"محمد صلاح فلتة صعب يبقى زيه في مصر كتير"
واكد عضو الاتحاد المصري لكرة القدم، على أن صناعة أكثر من محمد صلاح في مصر صعب، متابعا: "الأرجنتين فيها لاعيبة كتير، بس هو ميسي واحد، وماردونا واحد في لاعيبة كويسة كتير بس فيه فلتات، ومحمد صلاح فلتة واللي عمله محدش كتير عمله في مصر، وصعب يعمله".
وأضاف إمام، أن الاتحاد المصري لكرة القدم يعمل جاهدا على مضاعفة عدد اللاعبين المحترفين في الخارج، "بنعمل دلوقتي دوري الأكاديميات، علشان الأكاديمية تبقى تحت مظلة اتحاد الكرة، ويكون اتحاد الكرة تحط الأسس التدريبية، لتأهيل مدربي الأكاديميات، وعمل دوري للبراعم، وهو ما يزيد مستوى قاعدة الناشئين في مصر".
وقال لاعب نادي الزمالك السابق، إنه يحب الأكل الإيطالي، وكان لديه عقدة من زيادة وزنه بعد الاعتزال، موضحا "كان عندي عقدة في حياتي إن اللي يبطل كورة ألاقيه تخن وضرب، ولما بطلت بقيت أروح الجيم أكتر من الأول".
وأضاف إمام: "نفسي الناس تستمتع بكرة القدم، بقى فيه تعصب وعصبية زيادة عن اللزوم، وده زاد عن الحد، نفسي ميبقاش في تجاوزات، وأتمنى نكسب بطولة إفريقيا".
وتابع عضو الإتحاد المصري لكرة القدم: "بحاول أعود ولادي يلعبوا رياضة، ومش لازم يبقوا أبطال، وعن تجربة شخصية لولا الرياضة كان زماني بقيت بني آدم تاني خالص بشخصية تانية خالص، واللي عملته نفعني في أماكن كويسة".
واستكمل لاعب نادي الزمالك السابق، أن ابنته "هيا" تلعب التنس، وابنته "تاليا" تلعب كرة القدم، وابنته "لولوا" تلعب الإسكواش، موجها الشكر ل نور الشربيني، بطلة مصر والعالم بالإسكواش على إهدائها "مضرب إسكواش".