م الآخر| ماهو يا تغير الصنف.. يا تتغطى وإنت نايم

أصوات تلفاز متداخلة مع رنات الهاتف، أشياء متناثرة هنا وهناك، إضاءة خافتة مع أصوات أمطار في الخارج، تعلو كل الأصوات تدريجيًا، وتعلو وتعلو، طبعًا بالإضافة لصوت شخيري.. ورغم كل ده وأنا نايم عادي خالص ولا كأني فى حاجة، وبرضه مصر أنام.. أمال ما هو ما فيش أحسن من كده هدوووووء!!.
بعد محاولات عديده وصراع النوم مع هذا الضجيج، للأسف قومت وأمرى لله، صداع جاااامد يا معلم.. تقريبًا كده بايتة معايا حبتين (دماغي)، أو يمكن عشان الواحد لما بيفصل بتطلب معاه صداع.. آه معلش ماهو إمبارح الواحد كان مقضيها شرب وحركات رأس السنة برضه، ولازم تاخد واجبها وهابي نيو يير يا برنجي..
بالحق، اليوم السبت الموافق الأول من يناير سنة 2011، إلهي وإنت جاهي تكون سنة مفترجة علينا ويجعل استفتاحنا نادي بعون الله.. وبلاش أم الكوابيس اللي هجمت على الواحد دي وهو نايم، معلش أرجع وأقول الشرب يعمل أكتر من كده.. آه أمال.. مش معقول يعني اللي واحد بيحلم بيه ده.. ماهو يا تغير الصنف.. يا تتغطى وإنت نايم.
بصراحة حاجة أوفر أوووفر يا توشكى.. خير اللهم ما أجعله خير، كده على أول دقايق في السنة، قال إيه يحصل تفجير.. وناس تموت وناس تتعور.. وناس بتبكي.. وناس بتنوح.. مجزرة بجد، بس الحلو إني الناس دي كانت في الكنيسة بتصلي واتقتلوا وهما خارجين، حلو إيه يا عم ما هما كده كده كفار ماتوا في الكنيسة ولا بره برضه مسيحين.. بس كابوس فظيع الصراحة..
كان الحلم ملئ بالأحداث المثيرة والغريبة.. قال إيه الشعب العظيم ده عمل ثورة.. وعمو حسني "مش بتاع الساندوتشات"، أقصد مبارك الراجل مشى وإتخلى عن الحكم وحس على دمه بعد 30 سنة، إني الناس مش طيقاه ولا هو ولا مستر جيمي.. أم الكوابيس دي.. وأنا أعرف غيرك ريس لما تتنحى.. طب بحااا.. وغير وغيره..
طنطاوي مسك البلد وبوظها زيادة.. أحلام مستفزة، قال جيمي في طره.. وعمو الكتاتني بدل سرور.. اللي زاد وغطى بهدلة الست سوزي، الصراحة ماما سوزان اتبهدلت جامد في الحلم.. دي هي اللي علمتنا القراية يا جدعان هي اللي ثقفت الشعب كله.. أيوة الله!.
على فكرة كمية الدقون اللي الواحد شافها متتعدش.. وكلهم ما شاء الله كفروا أهلينا.. وأتذكر، أيضًا، أن هذا الحلم الدموي.. اللي فيه ناس كتير ماتت غدر، عشان ناس تانية تعيش، كنت بسمع الكلام ده في الحلم كتييير،
بس أكتر كلمة علقت معايا في الكابوس ده من كتر ما سمعتها (الإستبن).
حتى الإستبن طلع مفسي، ولا مؤاخذة، يعنى كلنا هنلبس، بس الحمد لله إنه طلع كابوس، آه كله إلا الإستبن، ناقصة هي حبسجية ورد سجون، دي مصر ياولاد التييييت!!.. دلوقتي بقى الواحد يظبط الدماغ بفنجان قهوة، ويفتح التلفزيون يسمع خطاب جمال بيه مبارك لشعبه.. الصبور.. الجميل.. المهاااااااااااود!!.