ريهام سعيد ترد على محمد رشاد: "أنا مش كبش فدا"

ردت الإعلامية ريهام سعيد، مقدمة برنامج "صبايا" على قناة "الحياة"، على تصريحات محمد رشاد والتي نشرها على حساباته بمواقع "السوشيال ميديا"، وقالت في بيان صحفي: "الأستاذ محمد رشاد هو أنت بتعلق على الحلقة على السمع؟.. يعنى ماتفرجتش غير على مقاطع الفيديوهات صح؟ اتفرج على الحلقة كاملة.. ولا حد جاب سيرتك ولا قال إنك اتخليت عنها".
وتابعت: "إحنا بنقول إن أي بنت بيتلغي فرحها بتزعل وده بيبقى خير للطرفين ركز في خطيبتك اللي في المستشفى وعلى فكرة إحنا طول الحلقة بنتمنى لكم التوفيق، مضيفة: "عمري ما تناولت موضوع غير وهو مطروح من قبلي حضرتك كنت ترند قبل حلقتي، ما تاخدش ريهام سعيد كبش فدا وركز في مشاكلك".
أشارت "ريهام": "الصحافة بتتكلم لمدة 3 أيام ومقررتش ترد غير عليه مع إنى الوحيدة اللي ماتكلمتش على سبب الانفصال لأنه خاص بيك"، واستكملت: "مفيش حاجة اسمها حياة شخصية، الشخصية عامة وهي دي الضريبة وبالرغم من أن كنا على علم بالموضوع يوم الأحد، لكن لم نذيع حرف يومها، إلا بعد ما الصحافة كلها اتكلمت ومي دخلت المستشفى".
واستطردت حديثها قائلة: "حضرتك قمت بتأليف سيناريو إن أنا قلت إنك اتخليت عنها ممكن يكون إحساسك لكن مجاش حاجه شبه كده على لساني.. أنا قلت بتمنى أنكوا تتصالحوا ولو محصلش يبقى خير فيكوا إنتوا الاتنين، أنا قلت إني بتكلم عنها مش عنك لإن البنت دايما بتأثر بإلغاء الفرح أكتر من الراجل".
وتابعت ريهام سعيد: "أستاذ محمد رشاد الخمس دقايق اللي في البرنامج، اللي بتمنى فيهم الشفاء لزميلة وبواسيها مايجوش حاجة جنب الأخبار اللي على المواقع.. متاخدش ريهام سعيد كبش فدا وركز في مرض خطيبتك وإلغاء زواجك اللي هما أهم بكتير، وأنا تحدثت عن نفسي وعن بكائي في أول زواج لي وتحدثت عن موضوع الزواج عموما وأنا واثقة في مصادري".
وأكملت حديثها: "تم عرض تقرير في إحدى البرامج عن موضوع زواجك ولكن لماذا لم تتحدث عنه هل لأن التقرير أنصفك وأظهر أنك أنت من على حق، وأخيرا زي ما قلت في الحلقة اللي أنت ماشفتهاش بتمنى لكم كل التوفيق".