ف القهوة قاعد بحكم العالم
الكرسي عرش.. وصحابي حملة أوفياء

ما تسبحوش بالحمد ليا ينتابني الجنون
يكفي تراكين مزيكا وقهوة مانو .. وننتشي بالوقت
بلاها قهوة طيب.. اكمني صاحب ضغط
ممكن سجارة وضحكة ممزوجة ب قلق صادق

لما المزاج يبسط نفوذه فوق إراداتي
بغير العالم
واكتب قصايد نورها بيغطي العفن

قلبت جيوبي ف آخر السهرة
لاجل انى أراضي القهوجي
ملقيتش اللضا

والقهوجي صمم أدوق من شجرة الفرقة
مرضيتش ف الأول ولكن رغبة الإنسان
هلت صورتها ساعتها تفزني ع الدوق
ودقت وف ثانية لقيتني ف أرض تانية

يومها الكافيه .. ما شبعش من دمعي الوفير
وال كام جنيه ماساعدونيش إني أحكم العالم
طلت صورتها بتبتسم للنصر
وإنى انطفيت ف الغربة لاجل العفش

تسألني مالك
وإن مرة تنفلت الإجابة (معرفش مالي وسيبيني أنا رايح الدوام)
واتشال وأقوم لابس كآبتي المفرطة
وانزل يوماتي ألملم القرشين واحول ف الحساب

طب مين يحاسب ع العمر اللي طار
طب مين يعاند حكمة الأقدار
طب مين هيقدر يقنعك إنك حمار

القصد بصحى م الحلم الكابوس
وألقاني على عرشي الوثير بتدفى بالونس المباح

(يا إيهاب** هحاسبك بكرة ..خستعت الفلوس)
وأمشي ب خطى واثقة ل طيات الهروب
معرفش بكره مخبي إيه
لكني حي الليلة.... هو دا المطلوب