زينة ل"عز" بعد براءته: ماكنتش هاسيبك تتسجن علشان ولادك مايبقاش أبوهم رد سجون

أعرب الفنان أحمد عز عن سعادته وترحيبه بقرار محكمة مستأنف مدينة نصر بتبرئته من تهمة سب وقذف الفنانة زينة ونفيه نسب طفليه منها اليوم الثلاثاء.
وكتب "عز" عبر حسابه على "فيس بوك": "بحمد ربنا وأشكر فضله، وأثق في القضاء المصري وكنت أثق في البراءة لأني معملتش أي حاجة غلط، وتربيتي إن الإنسان لازم يكون محترم في كلامه حتى لو الناس غلطت فيه، وربنا أظهر الحق وهنستمر في قضية النسب، لآخر يوم في عمرنا، بشكر كل الجمهور اللي ساندني".
وجاء رد زينة عليه عبر حسابها الشخصي "إنستجرام": "معلش بقى أنا ماكنتش ناوية أعلق بس بصراحة كدبك اللي مالوش نهاية بيستفزني جدا.. أولا مبروك براءتك من قضية السب والقذف في حقي ولو إن مبروك من تهمة دي مش حاجة تشرف أوي يعني انت ما أخدتش جائزة نوبل".
وأضافت: "كده كده ماكنتش هاسيبك تتسجن علشان ولادك مايبقاش أبوهم رد سجون.. ارجع بقى من لندن اللي انت مستخبي فيها، ماتخافش مش دي صورتك هناك أما بقى لو جبت سيرة ولادك وقضية النسب دي تاني هايكون ليا تصرف تاني معاك وبالقانون لأن القضية دي اتقفلت لآخر يوم في عمرك بطل كدب وبطل تضحك على الناس لأن الناس مش هابلة".
وتابعت زينة قائلة: "خلاص اتلهي في شغلك ومعجباتك.. وكفاية بقى فيلم محترم ده علشان ماحدش بيصدقه غيرك الناس عرفت حقيقتك ويا ريت تبطل تستغبى الناس.. والأهم من ده كله لو كان تم الحكم عليك كنت هاحس إن ربنا بيحبك وبيكفر عنك في الدنيا.. لكن الحمد لله حتى يبلغ الحمد منتهاه حسابك عند رب العالمين شايلهولك كله في الآخرة ومافيش أعظم من حساب ربنا".