سارة نخلة تخرج عن صمتها تُعلق على حبس زوجها أحمد عبد الله محمود

علقت الفنانة سارة نخلة على واقعة حبس زوجها أحمد عبد الله محمود على حسابها الشخصي بموقع "فيسبوك"، عبرت فيها عن معاناتها التي عانتها من زوجها ووالدته طوال السنوات الماضية، حتى أنتصرت عليه.
وقالت سارة: "اليوم يوم مميز بالنسبة لي كنت مستنياه بقالي سنة بالتمام والكمال بالصبر والاتكال على ربنا والحمدلله بعد عذاب وبفضل ربنا وفضل أستاذي وسندي المستشار عصام قنديل، المحترم حقي هايرجعلي وبحكم محكمة الحمدلله"، مضيفة "اليوم المحكمة حكمت لي الحمدلله وكسبت القضية بالرغم من أنه جايب ناس تشهد زور وهم ولا شافوا ولا سمعوا حاجة بس ربنا شايف وعارف وأظهر الحق وفلوسي هاترجعلي بالقانون وبحكم محكمة".
وتابعت: "أنا استحملت كتير كتير وناس كتير شاهدة وطول الوقت بقول مش عايزة محاكم ومش عايزة الموضوع يكبر ولكن الطرف التاني هو المسؤول عن كل دا و الراجل هو المسؤول في الآخر وعود كاذبة وتأجيل ومماطله"، مستكملة: "النهايات أخلاق وأنا اتمرمطت وغلبت سنة كاملة على ذمة راجل لا عايز يطلقني ولا عايز يرحمني وكل شوية يعملي قضية جديدة هو ومامته، ناس كتير تدخلت وأنا كبرت للناس كلها".
وتابعت:"سايرت كتير وناس كتير عارفين سارة صبرت قد أيه سنة كاملة رايحة جاية وبقول حسبنا الله ونعم الوكيل، بقول الكلمتين دول عشان محدش يحاول يقولي يا سارة ليه كدا ويا سارة خلينا نحل الموضوع بشكل ودي، أنا غلبت يا جماعه سنة كاملة ولا يصح الا الصحيح في الآخر"، مختتمة "ما تتكسفيش تطالبي بحقك عشان الي كالوا حقك عمرهم ما اتكسفو وهم بيبلعوه، البلد دي فيها قانون وفيها رجالة تهد جبال ولا يرضوا أن ست تتظلم رجالة بصحيح وقفوا معايا في أزمتي، شكرًا للقضاء المصري العادل النزيه الشريف و شكرا لرب العالمين وشكرا لاهلي الي استحملوني و استحملوا وجع الدماغ".
وقضت محكمة جنح أكتوبر، أمس السبت، حبس الفنان نجل الفنان الراحل عبدالله محمود، لمدة عامين، لإدانته بخيانة الأمانة، في الدعوى المقامة ضده من زوجته السابقة الفنانة السورية سارة جهاد نخلة، وكانت ذات المحكمة أصدرت حكما غيابيا بمعاقبة الفنان بالحبس لذات المدة، ثم قام بعمل معارضة على الحكم، وصدر بحقه الحكم المتقدم "حضوريا".
وقررت المحكمة، برئاسة المستشار أحمد عبدالجيد وسكرتارية ضياء صبحى، برفض الدعوى المدنية.
البداية عندما حررت الفنانة سارة نخلة في 26 أكتوبر الماضي، المحضر رقم 16125 جنح الدقي لسنة 2018، اتهمت فيه زوجها بالتعدي عليها بالضرب، وأحالت النيابة العامة القضية إلى محكمة الجنح التي عاقبته بالحبس 3 أشهر.