أحمد يونس يروى تفاصيل يوم حادث نجل شقيقته ويتوعد للجناة

نشر المذيع أحمد يونس على صفحته الشخصية على الفيس بوك صورة مرفقة ببعض التفاصيل التى أسردها عن يوم حادث أتوبيس المدرسة بالأطفال وكان من بينهم نجل شقيقته " مصطفى الشونى " الذى وافته المنية يوم 12 اكتوبر وكتب يونس :
يوم وفاة ابن اختي 12 اكتوبر الحزين الصبح
كنت في برنامجي الصباحي عالراديو
ودايما بيكون عندي تقرير مروري
-فاذا بي اتبلغ بحادث مروري في التجمع الخامس بين اتوبيس مدرسه واتوبيس رحلات وتسبب في وفاة طفل 13 سنه والباقي اصابات
– قلبي وجعني على ام وابو الطفل وقولت بالحرف يا قهرتهم على ضناهم
وطلعت من الاستوديو اتاكد من كل زمايلي ان ولادهم وصلوا مدارسهم بسلامه الله
فاتطمنت الحمد لله
ورجعت الاستوديو اكمل شغلي كانت الساعه 8،10 الصبح فاذا بي اتلقى مكالمه تليفونيه من اخويا الكبير بيقولي
مصيبه يا احمد مصيبه
حسيته انه هيقولي امك ماتت
لكن لاقيته بيقولي
مصطفى ابن اختك سماح مات في حادثه اتوبيس مدرسه
الجمله نزلت علي صعقتتي في كل جسمي
قفلت السكه في وشه وفضلت اقوم واقعد زي المجنون وانا مش مدرك اللي سمعته
وعمال اقول لا ده اكيد كابوس وهصحى منه اروح الشغل عادي
سيبت اليرنامج ونزلت اجري وانا مش عارف اعمل ايه ولا اتصرف ازاي
لحد ما روحت ولاقيت الكل موجود عند تلاجه ال—–
-ولاقيت اختي سماح في ثبات وتماسك ومفيش على لسانها غير راضيه يارب انا لله وانا اليه راجعون
الحمد لله
اللهم اجرني في مصيبتي
وبقت تسكتني
وحواليها صحبه من صديقاتها اللي بدعي لهم ربنا يكرمهم زي ما اكرموها وسندوها لحد يومنا هذا .. ونعم الصحبه بجد
ولاقيت حازم والد حبيبي مصطفى في صمت وذهول عمري ما هنساه
وهنا كل اللي مر عباره عن شريط اسود مفيهوش نقطه بيضا لحد ما ربنا كرمني اني غسلته بنفسي واتطمنت عليه وخدته في حضني احن حضن في حياتي كلها
انا عمري ما كنت متخيل اني اغطي حادث وفاة طفل واكتشف انه ابن اختي "ابني وصاحبي وحبيبي"
عمري ما كنت متخيل ان الحوادث اللي بنسمع عنها وارد نمر بيها
حق ابننا مصطفى لن يضيع واذا ابوه وامه سكتوا عنه بسبب الفاجعه اللي هم فيه انا مش هسكت عنه
عارف انه ابننا مش هيرجع
بس ع الاقل حبيبي يكون سبب في وجود شوية ضمير عند معدومي الضمير
احضنوا اطفالكم ومتزعلوهمش واسمعوهم
وادعوا دايما ان ربنا ينجيهم من شر الحوادث والفواجع
وادعوا لام مصطفى وابوه ولنا ولكل ام فقدت طفلها بالصبر
مع السلامه يا حبيبي
رجاء : انضموا لصفحة الملاك مصطفى من الرابط ده