شوبير يكشف تفاصيل جديدة في أزمة الأهلي ورمضان صبحي

قال الإعلامي أحمد شوبير، أنه تواصل مع كافة الاطراف فيما يخص أزمة رمضان صبحي لاعب هيدرسفيلد تاون الانجليزي مع النادي الأهلي.
وأضاف شوبير، خلال حلقة اليوم من برنامجه على قناة أون تايم سبورت: "في مكالمة جمعتني برمضان قالي الأهلي فاوضني من البداية وكابتن الخطيب استقبلني مقابلة أكتر من رائعة، وأنا مطلبتش غير إني أكمل في الاحتراف، والنادي قالي تمام ولو جالي عرض همشي، بس أنا كنت فاكر إني هكمل مع النادي لحد آخر الموسم وهشارك في أفريقيا والدوري وبعدين هعرف في أيه، ولحد شهر 12 مكانش في عرض أوروبي".
وأكمل: "في الفترة الأخيرة نادر شوقي طلب يقعد مع رمضان وقاله مفيش غير عرض الأهلي، فرمضان طلب إن التعامل يكون مباشر بينه وبين أمير توفيق لأنه زعل إن نادر مقدرش يجيبله عرض أوروبي، ورمضان قال لأمير هفتح السكة لبعض الوكلاء لأن نادر شوقي موفقش، صديق رمضان اسمه علي صقر قاله هجيبلك عرض من آسيا يعني من الصين أو الإمارات، وقدر يجيب عرض آسيوي، فبدأوا بيراميدز يتكلموا من أسبوع تقريبًا، وأمير قال لرمضان إحنا مخلصين، فرمضان زعل وقال الكلام اللي كان بينا بدأت أشوفه في المواقع".
وتابع شوبير: "رمضان قالي أمير قال تاخد كام؟ قولتله اللي تحطه في العقد أنا موافق عليه، فنادر شوقي طلب إن التوقيع يتم يوم الاتنين، راح رمضان قاله أنا زعلان عشان أنت مجبتليش عرض، أمير كلم رمضان قاله أنت رايح بيراميدز؟ رمضان قاله ليه لا؟ فظهر عرض تركي جايبه نادر لكن معجبش رمضان، ورمضان قالي حسيت إن كل قصة نادر شوقي إنه عايزني أوقع للأهلي، وحسيت إنهم مش بيشركوني في الموضوع".
واستطرد: "رمضان قالي فعلًا الناس في الأهلي قدروني، ومقدر إن الأهلي أعاده للنجومية وإنه خدم النادي، بس اسألوا أنا كنت باخد كام في إنجلترا، لكن بالتأكيد اللعب والجماهيرية فرق معايا، اللي ضايقني إنهم قالوا لكابتن الخطيب إني طلبت مهلة، وأنا مطلبتش مهلة ولا حاجة".
أتمّ شوبير: "رمضان قال إن بيراميدز عرضوا عرض كبير جدًا جدًا، وأنا راجل عندي مسؤوليات كتيرة، و إنه حزين عشان جمهور الأهلي زعلان، بس الموضع تأمين مستقبل".