ريهام سعيد تعتزل العمل الإعلامي: "كفاية بهدلة بقي تعبت"

أعلنت الإعلامية ريهام سعيد، اعتزالها العمل الإعلامي بعد قرار مجلس نقابة الإعلاميين بوقفه برنامجها، وذلك على خلفية ما أثير حول حلقة قد تم تقديمها مؤخرا، وانتقدت فيه ريهام المصابين بالسمنة بشكل غير لائق.
ونشرت "ريهام" عبر حسابه بموقع "إنستجرام" مقطع فيديو وقالت فيه:"بما إن هناك حملة ممنهجة من خلال المواقع اللي بتنزل كل 3 دقائق حاجة من الصبح تقوّم بيها الناس مش حقيقية، فمجرد أن حد يقرا اني أهنت الناس البدينة ومرضى السمنة، واحنا ناس بنكسل نقرا وبنكسل نشوف، فمبنصدق على طول ويزيط مع الزيطة ومش مهم بقى الست دي حالها وعيالها.. مش مهم بقى.. مش مهم نكذب ونصدق الكذبة".
وأضافت: "مفيش حد شاف الحلقة، مفيش حد شاف أنا قلت إيه، كل الناس بتردد لبعض كلام أنا ما قلتوش.. كل اللى قلته إن التخين شكله مش حلو ومش قادر يمشي على رجليه وعايش ميت.. في واحدة كاتبة إني قلت ملهوش حق في الحياة، وناس تقول إني أهنتهم.. لكن كلمة عايشين ميتين دي هم اللى قالوهالي، وبتكلم على الناس اللى فوق ال200 و250 كيلو".
وتابعت ريهام: "أنا بعتذر لكل الناس اللي زعلت مني عن سوء فهم لأني لم أقصد إني أهين أي حد.. ومش بعتذر عشان أرجع للشاشة تاني، أنا خلاص مش هشتغل في الإعلام تاني ولا التمثيل تاني، لأن أخطر من السرطان والسمنة، وأنا بقالي 16 سنة مضغوطة".
واستكملت: "جاء الوقت اللي أرتاح فيه وأقعد مع أولادي وأخلي بالي منهم، وأقعد مع جوزي ونقرب من ربنا.. 16 سنة بخدم الناس بس ونايمة بفكر مين عايز فلوس.. مين عايز كيس دم، ومعملتش فلوس وكانت نيتي خالصة لله- سبحانه وتعالى- عمري ما تربحت مرة ولا أخدت فلوس مرة.. عشت بضمير حي وراس مرفوعة".
وأشارت ريهام إلى أن اتهامها بأنها أخطأت عدة مرات غير صحيح: "الناس اللي بتقول أنا غلطت كام مرة.. أنا عمري ما غلطت ولا مرة.. لكن عشان ببقى ناجحة قوي ومسمعة قوي بتحارب، زي الواحدة اللي راحت أجرت لي واحدة وخدوا فلوس قد كده وتطوير واترميت في السجن 45 يوم ظلم.. لو أرجل راجل في الدنيا ميستحملش اللي استحملته نصف ساعة.. أنا اتبهدلت واتظلمت.. أنا عايزة أعيش حياتي كويس.. أنتم خدمتوني النهاردة، كل واحد علق تعليق مش كويس، واللي ألّف تأليفة أنا ما قلتهاش، لأنكم فوقتوني وعرفتوني إني لازم أعيش لنفسي وأولادي.. كفاية كده..كفاية بهدلة بقا.. الواحد لازم يعيش بكرامة، وإحساس الظلم ده وحش قوي، كفاية بقا تعبت، خلاص بقا".
وقالت: "أنا ما قلتش حاجة عن التخان، كل ده تأليف وظلم بس انتم خدمتوني وأنا مش راجعة تاني، أنا اتوقفت 30 مرة، وأول مرة أقول كده.. أنا مش راجعة تاني، لأن عندي حاجات اهم أعملها.. ربنا وبعدين ولادي..
وأختتمت الفيديو:"بشكركم جدا كل واحد ساهم في وقفي، بشكر جمهوري اللى هيفضل يدعيلي طول عمره، هتوحشوني وانتم عارفين أنا عملت ايه وده يكفي.. "كل الناس اللى بتدخل على المواقع من غير ما تشوف يقولها بلاش تقطع في..ولا أقولك قطّع أنا محتاجة حسنات أكتر وأكتر".