بعد فيديو السمنة.. إنجى وجدان تهاجم ريهام سعيد : مش من حقك وخليكى فى حالك

هاجمت الفنانة إنجي وجدان، الإعلامية ريهام سعيد ، بعد أن سخرت من أصحاب السمنة المفرطة، وقالت خلال برنامجها "صبابا" : "الناس التخينة ميتة، وعبء على أهلها وعلى الدولة، وبيشوهوا المنظر، منظرك بيكون مش حلو وإنتي بالعباية أو الجلابية ومش قادرة تمشي، بتفقدي جزء من أنوثتك".
وقالت نجى وجدان ، عبر مقطع فيديو لها على " اليوتيوب" : لسه متفرجة على فيديو لريهام سعيد ، أنا مبحبش أتكلم عن حد ولا أعمل مشاكل مع حد، بس "ريهام" بتقول فيه إن التخان ميتين وإن هما عبء على الدولة".
وتابعت :"أستاذة ريهام حضرتك كنتي عيانة أو عيانة أو معرفش، أنا واحدة تخينة ومعنديش كل المشاكل دي وغيري كتير، وكنت متعاطفة معاكي جدا لما أعلنتِ إصابتك بمرض نادر، وكنت بدعيلك، وناس كتير كانت ضدك وبقت بتدعيلك لما أعلنتي مرضك فمش من صالحك إنك تضايقي الناس وتغلطي فيهم
وأضافت :" أنا رياضية طول عمري، وتخنت، واتجوزت وجوزي رفيع وأحبنى رغم أني تخينة، وخلي بالك في ناس مريضة وتخنت وفي ناس عندها مشكلة في الغدد، وفي ناس تخان ورياضيين وممكن يكونوا أحسن منك في الجيم، ومش من حقك تقولي التخان ميتين، أنا أهو عايشة وبمثل وبدي للناس أمل مش بكأبهم وأضيقهم ، على أساس اية بتقولى كده؟ ودور الإنسان إنه يدى للناس أمل، لكن لما تقولي لشخص تخين أنه ميت فأنتي كده بتقضي عليه تماما".
وإختتمت :" لا أستطع استيعاب ما قولتيه أنا هتجنن، ليس من حق أي شخص أن يقول لي أنني سمينة أو لست على قيد الحياة، لا يجب أن نحكم على الأخرون من أشكالهم وأحجامهم لأنها تفاهة وعن نفسي أجد أنني تافهة لو فكرت في الناس من مجرد مظهرهم فقط أو ملابسه أو سيارته أو ما يفعله، وأتمنى أن تخلى بالك من تصريحاتك بعد الآن ولا اعتقد أنك على استعداد أن تخسري الناس أكثر من الجزء الكبير اللى خسرتيه بالفعل ومن فضلك خليكي في حالك".