محمد عبد الرحمن "توتا" يكشف أسرار عن طفولته

كشف الفنان محمد عبد الرحمن عن الكثير من أسراره الشخصية حول حياته قبل احترافه التمثيل، وذلك في مساحة عبر موقع تويتر، والتى أدارها الكاتب تامر عبده أمين.
قال محمد عبد الرحمن "توتا": "اشتغلت حاجات كتيرة أوي عشان أقدر ألاقي أصرف، اشتغلت في سوبر ماركت، وفي محل قطع غيار سيارات، وفي صيدلية، وبنزينة على الدائري، وداتا انتري، وكنا بنعمل حفلات في قصر محمد علي ونفرش الترابيزات ونغسل الكوبايات وننضف الأطباق، وفي آخر اليوم آخد 45 جنيه وجركن عصير".
أضاف عبد الرحمن: أول مرتب قبضته كان من البنزينة، كانت اليومية بتاعتي 20 جنيه، ومفيش حد بيشوف حلمك زيّك، مستحيل، شوف حلمك ووظف حياتك له عشان حتى تحس بطعمه، الطبخة الحلوة بيطبخها شخص مش 200 شخص، اعمل اللي عليك وسيب الباقي على الله، وخليك فاكر أن كل حاجة رزق من ربنا.
وعن وظيفة أحلامه، قال: "أنا كان نفسي زمان أبقى طيار، وبعدها طموحي اتغير وبقيت نفسي أبقى صيدلي ولكن مجبتش مجموع ووقتها حسيت أن الدنيا اسودت في عينيا، ولكن ربنا كان مجهزلي حاجة تانية وربنا اختارلي الخير والأفضل".
يذكر أن آخر أعمال محمد عبد الرحمن كان مسرحية "في نص الليل" في موسم الرياض، وهي مستوحاة من عالم الكاتب الراحل بهجت قمر، وشارك في بطولتها غادة عادل وحسن الرداد وريم مصطفى وسليمان عيد ومصطفى هريدي ومصطفى بسيط ونيللي محمود، ومن تأليف أيمن بهجت قمر، وإخراج عمرو عرفة.