إسلام إبراهيم يكشف تطورات حالته الصحية

طمأن الفنان إسلام إبراهيم، جمهوره علي حالته الصحية من خلال صفحته الرسمية علي موقع التواصل الاجتماعي «فيسبوك» وكشف عن سبب ارتفاع درجة حرارته وحالة التكسير بجسمة وقال إنها ترجع لإصابته بالتهابات في المعدة والقولون.
وكتب إسلام: «أولا بشكر كل الناس اللي حاولت تتصل بيا أو تبعتلي رسايل وآسف إني مكنتش بقدر أرد، بعد فحوصات وتحاليل كتير جدا اكتشفت أن عندي التهاب حاد في جدار المعدة أدى إلى التهابات في القولون، وده اللي كان مسبب كل الأعراض اللي عندي واللي هي أصلا متشابهة مع أعراض كورونا، ولكن طريقة العلاج مختلفة تماما، وده بعد ما اتأكدت أن معنديش كورونا بعدما عملت المسحة وتحاليل الكورونا مرتين».
وأضاف: «دعواتكم بالشفاء العاجل لأن الموضوع مؤلم جدا ومش سهل ولكن الحمد لله على كل حال، بشكر الدكتور أحمد سمير على وقوفه جنبي اليومين اللي فاتوا، فيه معلومات أخرى عن حالتي الصحية غير صحيحة بالمرة، وإن شاء الله هتعدي على خير بفضل ربنا ثم دعواتكم».
وقد أقلق إسلام جمهوره أول أمس بعد أن نشر صورة له من داخل المستشفى، وهو يتلقى المحاليل، وعلق قائلا: «بقالي أسبوع مش عارف أنا عندي إيه».
وأعلن في وقت سابق عبر حسابه ب«فيسبوك» ارتفاع درجة حرارته قائلا: «من شهر ونص كده جالي دور برد شديد قعدت فيه حبة حلوين، وطبعا أنا أول لما بكح بجري أعمل مسحة وتحليل أجسام مضادة عشان بخاف أعدي أمي وأبويا أو زمايلي لو بصور، والحمد لله النتيجة طلعت سلبية».
وتابع: «دلوقتي حرارتي 39 ونص، وبتطلع وبتنزل وعندي تكسير في عضمي والعيد باظ وبردوا عملت المسحة والتحليل والحمد لله النتيجة طلعت سلبية وطلع عندي بكتريا في الشعب الهوائية».
واختتم: «في الحقيقة في وسط انتشار الكورونا مناعتي دي بتضحكني قوي اللي هو أنا ضعيفة بس بشرفي مع ضحكة رقيعة كل سنة وأنتوا طيبين وعيد سعيد وخلي بالكم من نفسكم بجد الدنيا مش كورونا بس».