تامر حسنى ينهى أسطورة محمد رمضان ب "البدلة"

شهدت دور العرض السينمائى خلال سباق أفلام عيد الأضحى صراعاً شرساً بين النجمين محمد رمضان من ناحية وتامر حسني والمنتج وليد منصور من ناحية أخرى بعدما اشتعلت حرب التصريحات عبر مواقع التواصل الاجتماعي حيث يرى "رمضان" أنه "نمبر وان" وكذلك "حسني" من خلال إيرادات فيلميهما "البدلة" و"الديزل".
وتصدر نجم الجيل تامر حسني إيرادات أفلام العيد من خلال فيلمه "البدلة" مع المخرج ماندو العدل، ويشاركه البطولة أكرم حسني وأمينة خليل وماجد المصرى ودلال عبد العزيز ومحمود البزاوى وحسن حسنى، وسيناريو وحوار أيمن بهجت قمر، وتدور أحداثه فى إطار أكشن كوميدى، بينما جاء فيلم "الديزل" للفنان محمد رمضان فى المركز الثاني ويشاركه البطولة ياسمين صبرى وهنا شيحة وفتحى عبد الوهاب وتامر هجرس، وإخراج كريم السبكى، وتدور قصته حول "دوبلير" يقع فى حب فنانة معروفة.
تامر حسنى كتب تدوينه على حسابه الرسمى على "فيس بوك" قال فيها: "فرحتى كبيرة أوى النهاردة عشان فيلم البدلة فى أول أيام العيد يحتل المرتبة الأولى بأعلى إيرادات داخل وخارج مصر، والأهم ردود أفعالكم المحترمة والأكثر من ايجابية شكراً".
ورد الأسطورة محمد رمضان على نجم الجيل بعد ساعات قليلة، وكتب عبر صفحته الخاصة بموقع تبادل الصور الشهير "إنستجرام": "الحمدالله, شكراً جمهورى الغالي فيلم الديزل نمبر وان فى عيد الأضحى ويحقق أعلى إيرادات حتى الآن".
وأصدر محمود رمضان شقيق محمد رمضان ومدير أعماله بياناً صحفياً يتهم فيه المنتج وليد منصور بتزوير إيرادات فيلم "البدلة" لتامر حسنى لإصراره على أن العمل يحتل المرتبة الأولى فى شباك التذاكر وجاء فى البيان: "فى صحفيين بيقولولى إن فى شخص اسمه وليد منصور بيمدهم بأرقام مغلوطة تؤكد تصدر فيلم البدلة لشباك التذاكر وهو غير حقيقى لأن الديزل هو رقم واحد بحسب الارقام الصادرة من غرفة صناعة السينما والشركة العربية عن طريق الضريبة المحسوبة على كل تذكرة واللى بتكون محسوبة بالمللى"
ورد المنتج وليد منصور على رمضان برسالة قاسية كتب فيها: "الى شخص مجنون يدعى محمد مرضان وصلنى إنك بتبعت رسائل من تليفونك الشخصى تتهمنى فيها بتغير ارقام الإيرادات مكنش نفسى أرد على شخص زيك رمز للإسفاف علشان مخرج العمل ومنتجه أصدقاء محترمين بس أنت زودتها قوى يا حمادة, أولاً انت اسمك لازم كل مصر تغيره ل محمد مرضان لإنك بتفكرني بالمجانين اللى ماشين فى الشارع ومش عايزين يصدقوا إنهم مجانين فإرتاح يا حمادة محدش عاقل هيصدقك عمرك ما كنت رقم واحد"
وأضاف منصور: "عمرك ما كنت أحد نجوم الصف الأول وانت عارف إن السبب فنك هابط يا مرضان وملامحك للأسف تعمل غير دور المدمن أو البلطجى أو الإرهابى أو الحرامى انا كان نفسى متكلمش عنك لأنك أصلاً بالنسبة لى وبالنسبة لكل الشعب الراقى المحترم أكذوبة، وانت عارف إن أفلامك طول عمرها بتفشل قدام النجوم المحترمة زى السقا وعز وتامر وأستاذ عادل إمام، نصيحة يا مرضان روح أتمرن تمثيل بدل ما انت أداءك واحد فى كل أدوارك يا بنى أنت طبعاً هتموت عشان مش عارف تشترى فيوز زى أغانيك الهابطة فمفضوح اوى قدام الغلابة اللى مصدقينك اللى بينقرضوا واحد ورا التانى يا ولا"
وتابع منصور: "قسماً بالله لو لقيتك بتهرتل على اى حد تانى هيكون ردى اعنف من كده وأصلاً أنا لسه مخلصتش ردى, انت هتموت من الغيظ عشان البدلة علم عليك ولسه هنعلم اكتر وانت عارف هتتمسخر ازاى الفترة اللى جايه زى ما اتمسخرت فكل أفلامك اللى فاتت".