تصريحات "الملابس القطنية" تثير حالة من الجدل على مواقع التواصل الإجتماعى

ثارت حالة من الجدل بين المواطنين وخاصة مرتادى مواقع التواصل الإجتماعى بعد تصريح الدكتور هشام قنديل رئيس الوزراء والذى طالب فيه المواطنين بإرتداء الملابس القطنية وتخفيض عدد التكييفات فى المنزل الواحد وإجتماع الأسرة كلها فى غرفة واحدة لترشيد إستهلاك الكهرباء .
وانقسمت الآراء بين مؤيد يرى فى هذه الدعوات أمرا إيجابيا وشفافية ينبغى أن نساعد الحكومة على الإستمرار على نهجها ومعارض يرى أنها دعوة صريحة للتقشف ينبغى أن يتصدى لها الشعب .
وبالطبع لم يخل الأمر من السخرية اللاذعة التى يتسم بها المصريون فى مثل هذه المواقف حيث أطلق النشطاء "هاش تاج " هشام قطونيل " كصفحة للتعليق على تصريحات رئيس مجلس الوزراء الذى دعا المصريين لإرتداء الملابس القطنية .
وربطت أبرز التعليقات بين تصريحات قنديل ومشروع النهضة وجماعة الإخوان المسلمين " أراهن بكل ما أملك من ملابس قطنية إن اللي أشار‏ بالاقتراحات دي أكيد عصام العريان " و " نحمل التقشف والزهد لمصر (مشروع النهضة) و " حوش النهضة اللي وقعت منك يا كابتن " و "‏ احب اقول لأخوانا اللي كانو خايفين من الحريه والعداله لا يلبسوهم ما هم طلعوا فاهمين الحرية صح اهو و هتبقي حريه اجباري كمان "و " تلاقي خيرت الشاطر داخل علي مكتب الإرشاد جايبلهم بوكسرات قطن , و لاممهم في أوضه واحده عشان ترشيد الإستهلاك "و " عندكوا مشكلة زبالة؟ إنزلوا لموها. عندكوا مشكلة كهرباء؟ إلبسوا قطونيل. عندكوا مشكلة ميه؟ تيمموا. الواحد مكانش عارف هيعمل إيه من غير مشروع النهضة".
كما وجهت بعض التعليقات انتقادات مباشرة للحكومة دون سخرية " ممكن سيادتك تلم الوزراء كلهم في اوضة واحده وتحت تكيف واحد علشان الترشيد "و "طب و اللى شققهم هى أوضة واحدة و بيتقطع عنها الكهربا برضه يعملوا ايه يقلعوا و يناموا فوق بعض؟ "و "ممكن رئيس الوزراء يطلع ملابس قطنية زيادة على بطاقات التموين "وقال اخر " مبارك بداها ببطلوا خلفه عيال ... ومصيلحي قال اعملوا المحشي بالمكرونه وقنديل كمل : البسوا قطن ووفروا كهرباء .. هم كلهم كده؟؟" واشار اخر " بيقول ترشيد الاستهلاك اجباري من العام القادم ...دا متفائل جدا متخيل اننا هنسيبه فيها لحد السنه الجايه " و " الحمد لله الذي من على مصر برئيس وزراء يتدخل في نوع ملابس المواطنين الداخليه، تقريبا دي الدوله العميقه"
وكان من ابرز التعليقات التى حصلت على نسبة متابعة عالية " ناقص رئيس الوزراء يقول " رحرحه صح " و "تنفيذا لبرنامج السيد الدكتور هشام قنديل رئيس الوزراء لترشيد الكهرباء انا قاعد بالفانلة من امبارح والله الموفق " وربط اخر بين الزمالك والتصريحات وقال الزمالك بيفاوض ايمانويل "كلوتي"... الزمالك بيطبق نظرية هشام قنديل بالحرف " طب ممكن نستحمى سوا علشان نرشد المياه " و " وإن شاء الله رئيس الوزراء في الشتا يقول لنا البسوا جرنال على صدركم وانتم نازلين "
وعلي الجانب الأخر قاد المؤيدون للتصريحات حرب شرسة مع الرافضين وكان ابرز تلك المعارك علي الانترنت مع الناشط وائل غنيم أدمن صفحة "كلنا خالد سعيد" وقال علي الفيس بوك " كام واحد من اللي بيتريقوا على المؤتمر الصحفي بتاع هشام قنديل سمعوه؟ بعيدا عن موضوع القطن و الأوضة الواحدة المؤتمر فيه معلومات مفيدة واتكلم بصراحة وشفافية لحجم الأزمة وسبب الكارثة اللي حصلت أول امبارح و أتكلم عن خطة الحكومة في الفترة القادمة لتوفير المزيد من الطاقة وفي نفس الوقت عن أهمية الترشيد خاصة في المصانع والشوارع والمؤسسات العامة وعلى مستوى البيوت.
وأنا سعيد جدا بمستوى المؤتمر الصحفي وصراحته وسرده للأرقام بشكل حقيقي وطريقة عرضه للحلول. والأهم خطوات عملية عشان النور ميقطعش عن الناس ومحاسبة المسؤولين عن قطع النور في المناطق الحيوية اللي ممكن يتعرض الناس اللي فيها للخطر زي المستشفيات أو شبكات المترو أو غيرها"
وشارك الكاتب الصحفي عمر طاهر في الدفاع عن التصريحات وقال علي صفحته علي تويتر " اليابان لما قررت منع توليد الكهرباء بالمفاعلات النووية و أغلقتها و قل المنتج 40% فرضت بالأمر خطة ترشيد تفصيلية لعام من غير ما حد يرمى إفيه واحد"
واقترح طاهر عدة امور لترشيد الاستهلاك ومن بينها العدل فى قطع الكهرباء عن الناس والمصالح الحكومية و المصانع تدفع فورا الفواتير المتأخرة عليها بقالها سنين و بالإلزام مولدات كهرباء احتياطى فى كل مستشفى كبير على نفقة رجال الأعمال مخصومة من الضرائب و رقم ساخن للى سارقين كهربا طول الوقت