للتخلص من الحشرات المنزليه نهائيا

طبعا مفيش بيت مفيهوش حشرات منزلية زي "النمل" أو "الناموس" أو"الذباب" أو "الصراصير" وغيرها من الحشرات المنزلية اللي بتسبب الإزعاج... علشان كده كلامنا المرة دي هيكون عن طرق التخلص من الحشرات المنزلية...
الوقاية خير من العلاج
أنا شايفه إن الوقاية خير من العلاج والوقاية بتكون عن طريق...
الاهتمام بنظافة المنزل والمطبخ
الاهتمام بنظافة المنزل كله بصفة عامة، والمطبخ وأدواته بصفة خاصة علشان ما نديش الفرصة للحشرات إنها تتجمع حوالين بقايا الأكل... كمان لازم نراعي إن صناديق حفظ الفضلات والمهملات تكون مقفولة كويس، ونحرص إننا نفرغ محتوياتها باستمرار ونرش فيها مادة مطهرة من وقت لآخر علشان نموت أي بكتيريا أو حشرات ممكن إنها تظهر في الصناديق دي.
سلك الشبابيك والبلكونات أحسن حل
أنا دايما بأفضل إن نوافذ البيوت تكون عبارة عن شيش وزجاج وسلك علشان لما نفتح الشيش والزجاج نقفل السلك وبكده مفيش أي حشرة من الخارج تقدر تدخل جوه البيت.
نسد أي شقوق مفتوحة
يا ريت نحاول دايما إننا نسد جميع الشقوق اللي بتكون موجودة في البيت زي اللي بتكون بين فتحات السيراميك علشان الشقوق دي هي اللي بيطلع منها النمل والحشرات الصغيرة التانية..
الاهتمام بنظافة الحيوانات المنزلية الأليفة
لو كنا بنربي حيوانات أليفة في البيت زي "القطط" يبقى يا ريت إننا نهتم دايما بنظافتها أولا بأول علشان ما تكونش مصدر للحشرات في البيت..
وعلشان نقضي أولا بأول على أي حشرات ممكن تظهر في المنزل يبقى لازم يكون عندنا الحاجات دي في البيت
عجينة لإبادة الصراصير
دي عجينة لها مفعول السحر في القضاء على الصراصير اللي ممكن تطلع من بلاعة المطبخ أو الحمام...
مكوناتها:
ملعقة حليب بودرة + ملعقة سكر بودرة + بودرة "حامض البوريك" هنلاقيها في الصيدلية أو عند العطار.
الطريقة:
هنخلط كل المقادير دي بالماء ونعمل منها كرات صغيرة ونلزق الكرات دي في أنحاء متفرقة من المنزل وخصوصا في المطبخ والحمام على فكرة العجينة دي مفعولها بيقعد لمدة شهر وبتقضي على أي صراصير ممكن إنها تظهر في البيت..
خل التفاح أو الجاز للقضاء على النمل
لو عندنا مكان معين في البيت هو اللي بيطلع النمل ده يبقى يا ريت نرش المكان ده بخل التفاح أو الجاز.
وكمان القرفة المطحونة والفلفل الأسود للقضاء على النمل
كمان ممكن أننا نقضي على النمل بإننا نرش شوية قرفة مطحونة أو فلفل أسود أو كمون في الأماكن اللي بنلاقي فيها تجمعات من النمل.
النعناع الأخضر لهروب الناموس من البيت
لو عندنا ناموس في البيت ومش عارفين إزاي نتخلص منه يبقى كل اللي علينا إننا نجيب نعناع أخضر ونحطه في أماكن متفرقة في البيت.. وإحنا هنلاقي الناموس بيدور على أي مكان مفتوح علشان يطلع بره البيت.
المكنسة الكهربائية للتخلص من حشرات السجاجيد
لو عندنا حشرات في السجاجيد ومش عارفين إزاي نتخلص منها يبقى يا ريت إننا نكنس السجاجيد دي باستمرار بالمكنسة الكهربائية؛ لأن ده هو الحل الوحيد اللي هيخلصنا من الحشرات الموجودة في السجاجيد دي وبعد كده نرش السجاجيد دي بأي مبيد حشرات عندنا.
الثوم بيقضي على البراغيت نهائي
ممكن يظهر في المنزل بعض البراغيت نتيجة عدم اهتمامنا بالحيوانات الأليفة الموجودة في المنزل وفي الحالة دي يبقى يا ريت إننا نحط بعض الثوم الطازج في المكان اللي بتكون فيه الحيوانات دي علشان يقضي على البراغيت اللي ممكن إنها تظهر.
النعناع والريحان للقضاء على الذباب
لو عايزين الذباب ما يدخلش بيتنا نهائي يبقى يا ريت إننا نحط أصيص زرع فيه نبات "النعناع الأخضر" أو "الريحان" في البيت لأن النباتات دي ريحتها بتطرد الذباب..
وعلى فكرة ممكن إننا نستخدم النشادر علشان نقضي على أي حشرات منزلية موجودة عندنا؛ لأن مادة النشادر من أفضل المواد الطاردة للحشرات المنزلية.
للاعلان عبر موقعنا برجاء مراسلتنا على الايميل التالي:
elgomaaservices@yahoo.com
انتظروا قريبا على موقع الجمعة قسم الخدمات الالكترونية ( سوق السيارات – سوق العقارات – مطلوب عروسة- تفسير احلام – فتاوى دينية – العاب بنات – العاب طبخ – العاب فلاش – العاب سيارات – العاب باربي )
نقلا عن منتدى:مزيكا توداي