كشرى مصرى

المكونات:
كوب ونص عدس مغسول ومنقوع بالماء من بالليل للصبح
كوبين ارز معسول ومنقوع لمدة ساعة
كوب حمص الشام مغسول ومنقوع بالماء من بالليل للصبح
مكرونة اسباجتى ومكرونة عقل صغيرة وشعيرية
ملح وكمون وكزبرة وفلفل اسمر.
صوص الطماطم:
طماطم فريش مسلوقة ومقشرة ومضروبة بالخلاط مع م ك صلصة
تجهزى طاسة على النار بها زيت و4 فصوص ثوم مفرومين ولما يصفروا ضيفى لهم فلفل اخضر حار ....وم ك خل
ثم ضيفى الطماطم واتركيه يتسبك شوية
حمص الشام:
اسلقيه بماء مغلى على النار لغاية مايبقى طرى وسهل الاكل
وبعدين صفيه من المياه وضعى عليه زيت زيتون وملح وكمون وكزبرة وليمون وخل وممكن ثوم مفروم
طريقة أخرى لحمص الشام:
بعد السلق خدى شوية منه وضعيه مع ثوم مشوح على النار فى زيت قليل وفلفل اخضر حار وم ك شطة وملح وكمون وكزبرة وخل ومياه مغلية
بالنسبة للعدس:
هتضعى العدس على النار فى اناء به ماء واول مايغلى طفى النار وغطى الاناء واتركيه نص ساعة بالماء المغلى ثم صفيه واتركيه جانبا.
المكرونة:
تسلقى المكرونة بماء مغلى وملح لمدة 8 - 10 دقائق
وتصفيها وتقلبيها وهى ساخنة بقليل من الزيت وقطعة زبدة او سمن
الأرز:
تجهزى اناء به زبدة وزيت و4 ملاعق شعيرية وقلبيهم كويس ولنا تتحمر ضيفى الارز وقلبيهم كويس مع بعض ثم ضيفى 2 كوب ماء مغلى وقبل مايتشرب الماء ضيفى العدس والملح وكمون وفلفل اسمر قليل وهدى النار عليهم وضعى شياطة تحت الحلة
واتركيه يستوى عادى زى الأرز
البصل:
قطعى البصل حلقات او مكعبات حسب ماتحبى
وضعيه فى زيت بارد على النار مع استمرار التقليب لغاية مايبقى لونه بنى او لما يتحمر ويقرمش
بعد كدة لما كله يستوى
انا بحجهز حلة كبيرة وبضع فيها الارز بالعدس مع المكرونة وبقلبهم كلهم مع بعض
وبقدمه فى طبق التقديم وعلى الوش قليل من صوص الطماطم ثم البصل المقرمش وحمص الشام
وبقدم جمبه فى طبق جانبى صوص الطماطم
وحمص الشام
وبطاطس محمرة