خالد الصاوى يذم العسرى فى قصيدة على الفيس بوك

كتب الفنان خالد الصاوى اخر قصيدة وجهها الى فلول الحزب الوطنى والحكومة والمجلس العسكرى هذا نصها من وقت موقعة الجمل
حصل الطلاق بيننا وبينكم
ولأننا ناس طيبين
قلنا لبعض بلاش ندينكم
يوم بعد يوم بتغلطوا
وبتجبرونا عالغلط
وبتطلعولنا بالرصاص
وبتدينونا عالزلط
ماسكين خيوط كل الحاجات
وملعبين كل العرايس
... ومستفين كل الورق
ومطلعين كل المجانص
ولما ناخد بالقلم
أو بالقفا من الغريب
نلقاكو برضه السباقين
للاعتذار، وللزبيب
بكل ذوق وبالأدب
نسأل جنابكم الانصراف
أحلى من العلم الأدب
ومصر فيها ناس نضاف
الأرض طارحة بالأمل
والحلم اكبر منكم
انتم خسرتوا المعركة
علشان مشيتوا بضهركم
انتو انسحبتوا من الميدان
انتو اعتذرتوا عن التاريخ
انتو اللي هربدتوا الأمان
واديتوا فرصة للمسيخ
دلوقتي يالله بلاش كده
الناس بقت مش طايقة بعض
ما تخلوهاش تكفر كده
وتعضكم وتعض بعض
سيبوا الشباب يحلم بقى
ويحقق الحلم اللذيذ
ليه كل ما نفوت الشقا
يتشاكلوا حنا وعبعزيز؟!
مين اللي بيخطط ورا
واما نلاقيه يعمل عبيط؟
خليت غلابة يحلفوا
ليحاربوا بالبيض والسميط
سيبوا الكراسي سوست
مين مالطغاة ماتوا وخدوها؟
لو كان قلوبكم عالوطن
روحوا المتاحف عمروها!
يا اسيادنا ده صوت الشباب
يا اخوانا جيم لا مؤاخذة اوفر
انتم ديليت انتم ايريس
يا مفيرسين هارداتنا اوفر
عن إذنكم ناخد حاجتنا
كانت أمانة عندكم
إحنا اللي حنشيل القتيل
وحنسعفه من فضلكم
خللونا نتعلم سوا
وسيبونا نمشي لوحدنا
ما تغرزوش فينا الدوا
وما تحجروش على اهلنا!
احنا اللي زقينا السكوت
احنا اللي كهربنا العدم
احنا اللي أمِّنا البيوت
وحمينا مصر.. من البلم
احنا الجنينة كلها
واحنا الجناينية الأساس
والقصر ماله بطميها؟
ماتعبش فيها من الأساس
الثورة لسه بتنجلي
وبتتولد من بعضها
والناس بتكتب ملحمة
والله بكرة نحبها
وعذاب يومين ولا قهر عمر
طعم الكرامة ملوش مثيل
ولا حد يلمس سرها
إلا المضحي والنبيل
قصر الكلام من غير مناهدة
معاليك تسلم عهدتك
ودع حبايبك كلهم
وقول يا ربي حكمتك
الثورة مش موضة انتهت
والشعب مش حبة غنم
واللي افتكرناه ف صفنا
شق الصفوف، داس العلم
دلوقتي حي على الخلاص
شكرا على وقت السيادة
ولا عمري اطاطي للرصاص
ولا عمري حسجد للبيادة