" وائل راتب " يفتح قلبه ل " الجمعه "

أستطاع الشاعر " وائل راتب " أن يفرض سيطرته على الساحه الموسيقية بكلامه الرائع والذى نال إعجاب الملايين ، وذلك بعد أغنيه " ظلم الدنيا " وأغنيه " طماع " . وأستطاع موقع " الجمعه " أن يجرى حوار مع هذا الشاعر المتميز . فى البداية عايز بطاقة تعارف للشاعر وائل راتب ؟ وائل راتب .. شاعر غنائي وعضو عامل بنقابة المهن الفنية..من مواليد الإسماعيلية.. وضح لنا حياتك الفنية كيف صارت حتى الآن ؟ كنت مغرم جدااا بالقراءة فى جميع المجالات الأدبية ..وبدايتي الحقيقية كانت بعد انتهاء المرحلة الثانوية . عندما تعرفت على المطرب والملحن عماد الشاعر وكان يجهز البوم غنائي ، قدمت له غنوة دراما إسمها (إكدب) وبهرنى جدا بلحنها وغنائها وعجبت ناس كتير وبالذات المنتج اللى طلب إنه يشوفنى ولما قعدنا سوى طلب منى اعمل غنوة تكون(فرايحى ) شويه.. زائد إنى اعمل دويتو لنجم نجوم السامبا والنادى الإسماعيلى وقتها ( محمد بركات ) ضحكت وقلتله انا ماليش فى الكوره ومش بشجعها ومكنتش عارف ساعتها إن اللى كان موجود (محمد) نفسه فضحكنا كلنا وإعتذرتله ساعتها .. ووعدته إنى هحاول .. وبالفعل وأحمد ربنا إنى عملت الموضوع واتغنى كمان ونجح جدااا داخل بلدى وحقق مبيعات أنا مكنتش متخيلها .. وكنت فى قمة سعادتى وانا ماشى فى الشارع والناس بتردد اغانيا وإن كلامى كل الناس بتسمعه وبقيت ساعتها معروف فى بلدى وبفضل الله سبحانه وتعالى كنت وش الخير ع المنتج والمطرب .. وتوالت أعمالى مع المطرب نفسه وغيره .. أحمد ربنا ودى كانت البدايه ... ما هى الصعوبات التى واجهتها فى مجال الكتابة ؟ كل مجال فيه الحلو والوحش .. المهم إنت تختار تكمل مع مين .. الحمد لله .. بفضل ربنا .. سبحانه وتعالى .. كنت حريص جدا انى مقدمش حاجه مبتذله او تبقى فى رصيدى حاجه اخاف منها .. أو أتكسف .. منها . كنت دايما حريص اووى ومعتز بكلامى لأنى دايما كنت مقتنع انا بكتب إيه ( ومصدقه) وكان دايما بيقلق مطربين كتير منى.. رغم إنهم أصحابى .. لجراءة الحوار و الفكره . والحمدلله بإصرارى وإقتناعى . كنت دايما بعرف أوصل المعنى كويس أووى فكانوا بيصدقونى . وليا أعمال كتير جدااا فى البومات الكاسيت (الشرايط) لأنى من جيل ال الثمانينات والتسعينات (أجمل عصر للأغنيه) وإتعاملت مع ملحنين كتير أذكر منهم (عماد الشاعر- إيهاب زيدان- سيد رمضان- محمدعبدالسلام - محمد عبد المنعم ( المطرب والملحن حاليا).. وصديقى الملحن المميز جدااا إللى بحبه على كل المستويات (محمد الحسينى ) وناس كتير خايف أنسى حد منهم لأن معظمهم أعتزل المجال ومن الموزعين .. عمرو عيد .. أحمد عادل .. تامر صقر ..مصطفى السويفى ..سمير عفيفى . محمد طه.. محمد هارون .. وصديقى وأخى ورفيق مشوارى (إسلام عزازى ). وبرضه خايف اكون نسيت حد ويزعل منى ومفيش صعوبات الحمدلله لأن علاقتى بالجميع .. بفضل ربنا .. تمام ما هى بداية نجاح الشاعر " وائل راتب " ؟ بداية النجاح الحقيقى وإللى الناس بدأت تشوفنى كويس .. بفضل ربنا بعد تصوير عدد من الكليبات الفتره إللى فاتت وكان وش الخير عليا كليب(ظلم الدنيا ) للمطرب محمد الصغير وفى نفس التوقيت أيضا .. غنوة (طماع ) للمطرب سيد حلمى وإللى إتعرضوا وحققوا نجاح كبير .. بفضل ربنا سبحانه وتعالى .. وعملوا عدد مشاهدات ع اليوتيوب (أرضتنى شخصيا )حسيت إنى لازم أكمل بقى على نفس المستوى .. وبفضل الله ..بدأت العروض والأعمال لمطربين مش مصريين .. لوكا المغربيه .. صابر التونسى .. ريما الجزائريه.. إيهاب من الإمارات وإللى براهن شخصيا على غنوته ..لأنها تمت بالكامل خارج مصر ومحققه معاه نجاح كبير فى بلده ووعدنى إنه هيصورها قريب جدا .. والحمدلله . أنا راضى بما قسمه الله لى الحمدلله ما رأيك في فوز الفنان مصطفي كامل بمنصب نقيب الموسيقيين ؟ أنا شخصيا بحب( مصطفى كامل) إتفقنا ام إختلفنا ..شاعر جيل كامل إتربى على أغانيه .. مفيش مطرب مغناش ل (مصطفى كامل ) مفيش أغنيه منجحتش ليه .. موضوع الصراع على المناصب والسلطه .. معنديش فكره عنه .. أنا بتكلم على مصطفى الشاعر هل سنجد الأغنية الشعبية في حالة أفضل بعد وصول مصطفي كامل لهذا المنصب ؟ مصطفى كامل .. شاعر .. عمل لنفسه مدرسه .. إتعلم فيها ناس كتير وإختار لنفسه شكل محدش ينفع يقلده فيه .. وكتب جميع أشكال الغنا ... ومحبوب من فئات كتيره جدا من الناس ....حفر إسمه من الدهب ( لانه تعب وإجتهد جدااا) ولكل مجتهد نصيب .. لما يجى يشوف حال الاغانى بقيت بالشكل ده .. وهو اللى غناله نجوم العالم العربى .. لازم يحزن ..لانه بقى أمر واقع .. وإتفرض علينا .. و ده رأى الشخصى .. - هل تشارك فى الحياه السياسية الموجودة بالبلد ؟ وما هى أرائك السياسية ؟ بصراحه ماليش فى السياسه خالص .. بتابع زى كل الناس .. بس أختصرلك كلامى فى جملتين إختلفنا فى وجهة نظرنا.. وقررنا كل واحد يحتفظ برأيه لنفسه .. إختلفنا وكان سبب خلافنا.... إننا كل واحد فينا بيحب نفسه - كنت تؤيد من فى انتخابات رئاسة الجمهورية ؟ ولماذا ؟ بصراحه مشاركتش أصلااااا انتشرت مؤخرا حملة "تمرد" لسحب الثقة من الرئيس محمد مرسي ... ما رأيك فيها ؟ هقولك وإنت إفهمها .. براحتك مين مع مين على مين.. ومين ضد مين جنب مين ؟ كيف تري الوضع السياسي الحالي في مصر ؟ برضه هقولك جمله واحده .... يااااارب يارب نجى مصر وصونها وإحمى ولادها المحروسين ما هى أعمالك القادمه ؟ إن شاء الله بإمر ربنا .. سوف يعرض ليا فى رمضان مجموعة أعمال غنائية أتمنى إنها تنول إعجاب الناس االمطرب الشعبى وحبيب قلبى (رمضان فؤاد)غنوة (يرضيكوا ياناس كده ) كلامى .. لحن محمد . توزيع مصطفى السويفى ..والمطربه أسرار الجمال (ضعفى ليك ) كلامى ولحن محمد وتوزيع تامر صقر والمطرب علاء البحار (مااتعلمتش) كلامى ولحن الحسينى وتوزيع سمير عفيفى ...والمطرب محمد شحته (عليه العوض فيها)كلامى .لحن الحسينى وتوزيع سمير عفيفى .. والمطرب كمال المصرى (الليله فرحى) والمطرب رضا الوردانى (النهارده إفتكرتى )ولوكا المغربيه (هقول لماما وكداب وسيبته ) والحمدلله أكتر من عمل وسيت كوم بفضل الله ما هى طموحاتك التى تتمناها فى المرحله القادمه ؟ طموحى مالوش نهايه .. وربنا سبحانه وتعالى بيدى الإنسان على أد عمله وإجتهاده وبفضل الله يكفينى حب الناس وربنا يديم المعروف .. وبجد أنا كنت فى منتهى السعاده معاك لانك حقيقى من الشخصيات إللى انا بحبها جدااا وخلتنى أفتكر أجمل أيام وسنيين وذكريات حلوة أوووى بجد ميرسى ليك جدا يا (سيد ) على اللقاء الجميل اووى ده وكل شكرى وتقديرى واحترامى لموقع (الجمعه ) وكل الناس الجميله المحترمه المشرفه عليه تحياتى ليكوا وائل راتب