" لجأت للمهدئات بعد وفاة والدتي وماري منيب مكنتش عجباها ".. أبرز تصريحات ميمي جمال

حلت الفنانة ميمي جمال، ضيفة ببرنامج " واحد من الناس " مع الاعلامي عمرو الليثي على شاشة الحياة الفضائية، وتحدثت عن أعمالها الفنية ومعاناتها ومشوار زوجها الراحل حسن مصطفى، لذلك نستعرض أبرز تصريحاتها في السياق التالي.
لجوء ميمي جمال للمهدئات

مرت الفنانة ميمي جمال بأزمة نفسية بعد وفاة والدتها قائلة:"في فترة طويلة من حياتي لجأت للمهدئات علشان اعرف انام بعد وفاة والدتي لإني مكنتش اعرف اشتغل لو مكنتش موجودة وكان عندي توأم وهي شيلاني ولما تعبت انا تعبت فكنت باخد حاجات علشان اعرف أنام".
تعاون ميمي جمال مع سمير غانم

تحدثت ميمي جمال عن تعاونها مه الراحل سمير غانم،، وقالت إنه ا عملت مع سمير غانم في المسرح كثيرا، ومثال على ذلك مشاركتها وزوجها الفنان الراحل حسن مصطفى معه في مسرحية "دوري مي فاصوليا"، متابعة: "لازم اللي يشتغل معاه يكون صاحي ومركز، وهو كان بيقول عليا عمود الكردان بتاع المسرحية".
بماذا وصفت ميمي جمال زوجها حسن مصطفى؟

قالت الفنانة ميمي جمال: "زوجي الفنان حسن مصطفى كان جادا جدا في البيت، ومبيعرفش يهزر ولا يقول نكت".
بماذا وصفت ميمي جمال ماري منيب
وأضافت : "ماري منيب أول ما شافتني قالت البنت دي مش عجباني، وكانت عايزة تمشيني، وقالت أنا اتحولت منك على المسرح وإيه رايحة جاية، تقومي تقعدي،أنا البنت اللى تشتغل معايا تقعد جنبي على الكنبة، ومش أقول الإفيه وانتي تعدي من قدامي".
وأضافت: "ماري منيب لطيفة أوي، إلا إنك تبوظ لها شغلها، قلت لها أنا هقعد ومسمار وشاكوش ودقتني على الكرسي ومتحركتش علشان مزعلهاش وده عجبها".
نقطة ضعف ميمي جمال

وتابعت: "نقطة ضعفي قلبي لإني حنينة زيادة عن اللزوم ولو أي حد قال حاجة مؤثرة أصدقه لحد دلوقتي وأنا في السن ده، وده غلط لإني اتخدعت كتير في ناس مكنتش اتخيل، بس بقيت اسمع من هنا وامشي من هنا".
ميمي جمال تكشف حقيقة عمليات التجميل

وعن عمليات التجميل قالت:"مقولتش إني أجريت عمليتين تجميل لإني بترعب من العجز، أنا لسه احتمال الشهر اللي جاي أروح حفلة في لبنان وفيها حد عايز يعملي تجميل في رقبتي وقال لي هتجيلي آخدك غرزتين، أنا عارفة عيوبي اللي في وشي وبالمكياج بيروحه".

إعجاب ميمي جمال بالجيل الجديد

أعربت ميمي جمال عن اعجابها بالفنانة منى زكي: " كنت عضوة في لجنة تحكيم الأوسكار المصري؟ أدي الجائزة لمنى زكي عن مجمل أدوارها".

وتابعت: "وبالنسبة لمحمد رمضان فهو شاطر وذكي وبيعرف يروج لنفسه كويس، جعفر العمدة قدم فيه كل حاجة ممكن تتصورها قدم الرجل المزواج، والتاجر الشاطر، وجمع كل الحاجات اللي ممكن تتفرج عليها وهو ذكي وربنا هيوفقه".
رأي ميمي جمال في دار مسنين

وأوضحت: "كنت بفكر أعمل دار مسنين، والدكتور أِشرف زكي عمل ده، وأي حد من الممثلين لو عنده مشكلة هو بيتدخل في ده، وعن نفسي لا يمكن أعيش في دار مسنين".
تفاصيل من حياة ميمي جمال

كشفت ميمي جمال تفاصيل من حياتها، قائلة:" دي حاجة اسمها هبة على حياة عينك أنت بتتعامل مع فلوسك زي مانتا عايز، وبعد كده الحاجة بتبقى معروفة رايحة لمين وفين، ودي حاجة مريحة ليهم وليا".

وتابعت: " أنا بعمل كده، ليه ميفرحوش من بدري؟ بالنسبة للصرف أنا باخد أرباح الفلوس، الهبة بعد الوفاة لكن ما دام الانسان عايش يتعامل مع فلوسه عادي".

واستطردت: " بالنسبة لأزواج بناتي فعندي حكمة لو نكدت عليهم هينكدوا عليهم، لو نكدتي على زوج بنتك هينكد عليها وهتيجي تعاتبك بعد كده، مبحبش ادخل ومصاحباهم جدًا".