شهر العسل في تايلاند .. عيوب ومميزات بوكيت .. أوعى تغلط غلطتي!

دائما قبل الفرح بتبدأ تساؤلات شهر العسل يبقى فين؟ .. اكثر سؤال بيتعبك "هل تعمله جوه مصر.. ولا بره مصر" .. وأول اختيار بيكون بلد في آسيا وخلّينا نتكلم عن تايلاند مثلا.. وبالتحديد المدينة الساحلية اللي هناك وواخدة كل الاضواء والشهرة "بوكيت"
شهر العسل في تايلاند .. عيوب ومميزات بوكيت!
انا قعدت في تايلاند 12 يوم.. وكانت معاناة.. معاناة في حاجات كثيرة.. الفنادق هناك بتعمل فطار انترناشيونال بس الفطار بيبقى بعيد أوي عن طموحات المصريين يعني مثلا تايلاند محليا مفيهاش "جبنة" الفنادق متعرفهاش.. ميعرفوش العيش بأنواعه كل اللي عندهم "توست" ..
الفندق هناك بسيط علما بأني كنت في فندق خمس نجوم بحمام سباحة برايفت .. بس الحياة في فنادق مصرية 3 نجوم أعلى بكثير من الحياة هناك.. 80٪؜ من شوارع تايلاند فيها أكشاك بتعمل أكل ريحتها صعبة..
إزاي تنبسط في تايلاند .. وايه التعليمات اللي لازم تنفذها والبرنامج اللي تمشي عليه؟
- اول حاجة لازم تعملها انك تاخد معاك معلبات كثير.. حاجات مش هتبوظ وهينفع تحطها في الثلاجة وتطلع تاكل على طول.. تونة - فول - إندومي، خد معاك عيش فينو وبلدي..
- حاول تحجز فندق جنب bangala road الشارع ده فيه حياة ومنها هتحجز كل رحلاتك اللي هتعملها في تايلاند، واسمع السعر من كشك واثنين وثلاثة وفاصل على اد ما تقدر.. فاصل مرة واثنين وثلاثة..
- فيه رحلات لازم تعملها بالترتيب كدة .. الرافتينج ممتع جدا متدفعش فيه اكثر من 800 بات، وده بتكون رحلة بتبدا بزيارة لكهف القرود ثم تروح مكان بتلعب فيه العاب مائية ورافتينج في المياه وبيتش باجي، ولو داخل ضمن الرحلات الباقية هيبقى أرخص من كدة .. الرحلة الثانية زيارة لجزيرة بي بي إيلاند ودي بتزور فيها اكثر من مكان، وجيمس بوند برضة بتزور فيها أماكن كثيرة، الفكرة بقى متاخدش الرحلات الثلاثة دول بأكثر من 1500 بات للشخص الواحد أي ما يُساوي 750 جنيه مصري.
- انت بتحجز في الأكشاك وبتقول اسمك والفندق ورقم الغرفة، وهما بيجوا الصبح تاني يوم يخدوك من الفندق ولازم تكون في الريسيبشن حسب الميعاد لو جه ومكونتش تحت هيكلمك في التليفون لو مردتش 5 دقائق وهيمشي..

- لو معاك فلوس روح اتفرج على فانتاسي شو هي غالية شوية ب 1500 جنيه مصري للشخص الواحد بس ممتعة ده عرض مسرحي بيشارك فيه جزء كبير من الحيوانات.. و بتكون عن تاريخ تايلاند..

- علشان متلفش كثير .. الجبنة موجودة في ماركت كبير اسمه big c بس غالية لانها مستوردة.. متسألش حد في الماركت علشان معظمهم مش بيتكلموا انجليزي دور على الحاجة بنفسك.. فيه ماركت مالي البلد وبيشتغل 24 ساعة اسمه seven eleven هتلاقي فيه 90٪؜ من احتياجاتك اليومية..
- لازم تخوض تجربة انك تاكل في المطاعم العربية مطعم القاهرة الاكل طعمة حلو اوي بس غالي شوية وفيه مطعم سوري كلت فيه شاورما حلوة بس سعرها أغلى من مصر والناس اللي شغاله فيه عرب .. يعني اعمل حسابك تزود الباكيدج بتاعك 5 آلاف جنيه لو هتاكل كل يوم من المطاعم دي، المطاعم الانترناشيونال كويسة ماكدونالدز وبيتزا هات، مجربتش كنتاكي..
- هتلاقي في بوكيت مول أسمه jungceylon.. هتلاقي فيه كل حاجة محلات وبرندات وكل حاجة هتحتجها من تايلاند.. وهناك فيه سوق اسمه بانزان هتجيب منه سمك فرش وتعمله وانت واقف وهتاكل اجمل مأكولات بحرية، جرب الفاكهة بتاعتهم هتعجبك، متركبش توكتوك من غير ما تتفق هياخد كام قبل ما تركب، وفاصل هتلاقي كل التكاتك متفقة مع بعض..
- هتحجز في شواطئ ببوكيت أهمها براديس ودي دخولها تقريبا ب 200 بات بتبقى ممتعة ومناظر طبيعية رائعة .. كل الرحلات كويسة ومناظر طبيعية .. بس الموضوع مش ممتع زي ما الناس متصورة..
مصر ولا تايلاند؟
المدن السياحية في مصر جميلة.. المدن الساحلية فيها من اجمل المدن في العالم، الشعب المصري اللي شغال في السياحة ودود، ومثقف، ومبدع، هدفه الوحيد ان الشخص اللي جاي ده ينبسط..
لو بتحب الأكل والأنتخة يبقى مصر بدون ما تفكر، لو حابب تخوض تجربة جديدة يبقى تايلاند، لو بتحب الفنادق الفخمة يبقى مصر، لو عايز تفضل في الشارع يبقى تايلاند، لو بتحب حمامات السباحة يبقى مصر، لو بتحب تنزل البحر اكثر يبقى مصر برضة.. اختياري الاول هيكون مصر..