لفتة رائعة.. الصقر أحمد حسن يزور مريم "ابنة البواب" صاحبة ال99% بالثانوية العامة

حرص أحمد حسن نجم منتخب مصر السابق وعميد لاعبي العالم علي زيارة الطالبة "مريم" ابنة حارس أحد العقارات في مدينة نصر والحاصلة علي مجموع 99% في الثانوية العامة هذا العام والذي تم تداول قصتها عبر مواقع التواصل الاجتماعي، وذلك رغبة منه للاحتفاء بها وتهنئتها علي تفوقها الكبير.
ونشر "الصقر" عبر حسابه الرسمي علي موقع "فيس بوك" بعض الصور مع الطالبة "مريم" واسرتها وكتب تفاصيل زيارته للطالبة المتفوقة بعنوان "يوم مع الدكتورة مريم" قائلًا: " تواصلت مع أحد الأصدقاء بعدما نشر قصة الطالبة مريم الحاصلة علي 99% بالثانوية العالمة وهي ابنة حارس عقار بسيط، ولكنه كبير مقامًا وعفيف النفس وطلبت منه زيارة منزلها".
وأضاف: " ذهبت للمنزل ورأيت أد اية مريم فخورة بأبوها وأمها وأهلها كلهم ، وهم دول فعلا اللي يتقال عليهم ولاد الناس مش زي ما المجتمع المريض بيصور الناس دايمًا بالمظاهر الكدابة، وده للاسف أصبح حال مجتمعنا الردئ، ولاد الناس الحقيقيين هما اللي عرفوا يربوا ولادهم، وهم اللي بيحافظوا علي قيمهم ومبادئهم وأهاليهم".
وتابع: "ولكن بما ان ده مجتمعنا واصبحت دي نظرة المجتمع ل"ولاد الناس" فنفس الشئ ينطبق علي اعلام اعمى عن رؤية النمادج المشرفة..تفتكروا حد النهاردة هيجري ورا مريم ويدفعلها فلوس عشان يستضيفها ويطلعها كنمودج مشرف فهي بنت حارس العقار البسيط وعندها اربع اخوات وفي غرفة واحدة قدرت تتحدى كل الصعوبات دي وتجيب 99%اكيد محدش هيعمل كدة عشان اصبحنا في زمن التفاهات والهلس".
وأردف: "نموذج زي مريم الاعلام اكيد مش هيجري وراه ، لكن طبعا يجروا ورا نماذج التعري التانية ، اللي كل ما تتعرى اكتر يدفع لها اكتر وللاسف هو ده بقى حال مجتمعنا واعلامنا..مريم النموذج المفترض تقديمه لأبناءنا ونجري وراه وندفع لها بالدولار وهي اللي تتنك علينا".
وأتم حديثه قائلًا: "مبسوط جدا النهاردة إن أنا زرت العيلة دي وأنا فخور ببنت زي دي وبعيلتها، ليا صور كتير بعتز بيها وبكون فخور بيها ولكن الصورة دي هحتفظ واتشرف بيها، وكمان هكتب تحتها شكرا لمريم انها اتصورت معايا عشان والله ومن قلبي انا كنت اتمنى ان نموذج مريم ده تكون اختي او بنتي ، باصرارها وعزيمتها وطبعا ادبها واخلاقها وتربيتها عشان كنت هطلع واقول دي اللي شرفتني .. شكرًا للدكتورة مريم وعائلتها".