عمرو سلامة يسرد أهم 10 أسباب جعلت من سمير غانم "أجمد واحد فى التاريخ"

وجه المخرج والمؤلف عمرو سلامة، عبر حسابه الشخصى بموقع التواصل الاجتماعي "فيسبوك"، رسالة خاصة للفنان سمير غانم، أوضح فيها الأسباب التى جعلت سمير غانم أجمد واحد فى التاريخ.
وكتب سلامة يقول: "عشر آسباب ليه سمير غانم أجمد واحد في التاريخ.
- لان استحالة يقول جملة من عشر كلمات وماتضحكش.
- لأنه حتى لو كان في فيلم دراما جاد كان بيهرج ومش واخد الموضوع جد.
- لأنه حتى لما مثل أفلام مقاولات خلى بعض أفلام المقاولات تاريخ نتذكره ويتحاكى به.
- لأنه أول فنان مصري يعمل ستاند أب كوميدي. (راجع عشر دقايق كاملة يتكلم فيها بمفرده في مسرحية أهلا يا دكتور عن رحلته لفرنسا). *موجودة في التعليقات
- لأنه ضحكنا طول عمرنا وهو عنده شنب.
- لأنه خلى واحد من أفلامك المفضلة فيلم بيمثل فيه أسوأ من مثل على شاشة السينما على الإطلاق... إكرامي. (راجع فيلم يا رب ولد).
- لأنه خلف دنيا وإيمي.
- لأنه عمل فطوطة وكابتن ميزو.
- لأنه قبل ما يقفل التليفون مع صفاء قال "ماعلش يا حبيبتي علشان في حاجة غريبة دخلت". (راجع يا رب ولد برضه)، لأنه لما غني موال قال "العريس متين والعروسة متينة"!!! لإنه حتى كان بيهرج بلبسه، وكان بيلبس اللي هو عايزه حتى لو مش لايق على الدور والمكان والزمان.. وماتكسفش يلبس لبس ست عندها بدل صدرها صواريخ.
- لان أهم مدرسة فلسفية في التاريخ هي فلسفة "سمير غانم"، وتتلخص في "أخرج عن النص" النص اللي الحياة بتحطهولنا، وتبنى فكرة "هرج حتى لو مش وقت التهريج"، ماخدش حاجة جد، وكأنه بيقول بقصة حياته "لو هرجت أو خدت الدنيا جد في الآخر مش هاتفرق".
سمير غانم مش بس ممثل كوميدي، سمير غانم ظاهرة كونية لن تتكر، وسيقف علماء التطور أمام موهبته، وأعتقد إن بعد سمير غانم البشرية هاتبدأ كجنس بشري في التراجع ثاني.
لو عايزين نقدر الراجل ده ونديله حقه، أحسن حاجة نتبنى فلسفته، ومانخدش حاجة جد.