"كوكا" ينعى والده برساله مؤثرة عبر صفحته على "فيس بوك"

نعى أحمد حسن كوكا، لاعب سبورتينج براجا البرتغالى، ومنتخب مصر الوطنى، والده، الذى وافته المنية قبل أيام قليلة، بعد صراع مع المرض.
وكتب كوكا عبرصفحته الرسمية على فيس بوك " رحل أعز و أغلي و أطيب و احن وأرجل أب في الدنيا بعد صراع كبير مع المرض , مفيش كلام يقدر يوصف الي جوايا ، اول مره ارجع مصر و لا اشوفك ، كنت بتتالم و بتتعذب من الحقن والادوية و عمرك ما اتكلمت و قولت تعبان".

وتابع " كنت المفروض تعمل العمليه من 7 سنين اول مكتشفت المرض ، مرضتش تقولنا عشان تجبلنا و تعملنا كل الي نفسنا فيه ، و فعلا عملتلنا كل حاجه ، كل حاجه عايزنها لاقيناها ، كان نفسك تشوفني من أحسن اللعيبه في العالم ، كان نفسك تشوفني مشرفك و مشرف بلدي ، اخواتي كانو بيقولولي لما بجيب جون نفسيتك بتبقي عامله ازاي و اد ايه بتبقي فرحان".

وواصل كوكا كلماته المؤثرة " انا بقولك اني هكمل وهفضل لحد ما أحقق حلمك و اني هشرفك وسط اهلك وإن هنفضل بجانب بعض انا واخواتي وامي ، وحاجه عن أمي يا بابا انت اخترت اعظم ام في الدنيا ، عمرها ما اشتكت و هي بتعملك كل حاجه وانت عيان ، فخور اني ابنك فخور اني أقول انا ابن الكابتن طيار حسن محجوب ، ربنا يرحمك و يجعل قبرك روضه من رياض الجنه اللهم لا اعتراض، ان لله وان اليه راجعون".