بالفيديو.."تعالوا نحب بعض"..ننشر كلمة السيسي خلال جولته الرياضية والمقرر بثها مساء اليوم

قال الرئيس عبدالفتاح السيسي، خلال كلمته التي ألقاها بالماراثون الرياضي صباح اليوم، :"أيوه مش هتتبني بلدنا غير كده" مضيفًا يعني أنا لو اتمشيت إن كنت أقدر أو لقيت وسيلة زي دي "الدراجة" يبقى أنا في اليوم اللي هعمل فيه كده هوفر لمصر 16 جنيه.

وتابع الرئيس : أرحب بكم جميعًا، كل المشاركين معانا في هذا النشاط اللي رمزه معناه إن إحنا ممكن بالحجم الكبير ده نبقى متجمعين عشان هدف واحد، وهو عدم الإختلاف موضحًا : وأنا لما أجيب شباب من الجامعة مع شباب من الجيش مع شباب مع الشرطة بقول ببساطة خالص وكمان أي حد عايز يشارك معانا لازم نعرف بعض كويس، ولازم نحب بعضنا .

وأردف: ولما أجيب شاب من الجامعة وأقول له تعالى أقف جنب أخوك اللي هيتخرج من الشرطة هو أخوك بيحبك وأنت كمان تحبه، لما أجيب شاب من الجامعة وأقول له خليك مع أخوك طالب الجيش طالب الكليات العسكرية خليكم مع بعض اعرفوا بعض أصل أنتم مش غرب عن بعض".

وعن الهدف من ذلك قال: الهدف مش فكرة إننا نعمل نشاط ورياضة بس فيه رمز للموضوع وللوحدة وحدتنا كلنا كشعب.. وعاملين النشاط عشان كده والفكرة بتاعته مبينة إن عندنا كتير يجمعنا، وإحنا المصريين نتجمع على قلب رجل واحد ولا نختلف أبدًا، موضحًا : لو حضرتك راكب عربية هتدفع تقريبا 4 جنيه في ال20 -25 كيلو ومصر هتدفع 8 جنيه في ال20 كيلو دول.. ياه يعني أنا لو اتمشيت إن كنت أقدر أو لقيت وسيلة زي دي يبقى أنا في اليوم اللي هعمل فيه كده هدي مصر 16 جنيه، طيب لما يكون فيه 3000 آلاف بيعملوا كده يبقى اليوم فيه كام أنا قلت على مشوار واحد.

ومن المقرر أن يذيع التلفزيون المصري عقب نشرة الخامسة كلمة الرئيس عبدالفتاح السيسي، ويتم إعادتها عقب نشرة التاسعة.